თეა წულუკიანმა პრეზიდენტის განცხადება შეაფასა, რომელშიც სალომე ზურაბიშვილმა აღნიშნა, რომ მიხეილ სააკაშვილი განსაკუთრებული პატიმარია. ვიცე-პრემიერის თქმით, მან არ იცის რა იგულისხმა პრეზიდენტმა, მაგრამ ვარაუდობს, რომ საუბარი სააკაშვილის ექსპრეზიდენტის სტატუსზე იყო.
„სხვა მხრივ ეს პატიმარი ზუსტად ისეთივე პატიმარია, როგორიც ნებისმიერი სხვა და მინდა კიდევ ერთხელ ყველა იმ პატიმარს, რომელიც დღეს საპატიმროში შიმშილობს, მოვუწოდო შიმშილობის შეწყვეტისკენ, რადგან ეს არის პროტესტის ის ფორმა, რომელიც სერიოზულად აზიანებს ჯანმრთელობას. მინდა ყველას მოვუწოდო – თუ პროტესტის გრძნობა გვაქვს, ეს პროტესტი გამოვხატოთ სხვა ფორმით და არა ჩვენი შვილების, ოჯახების წევრების ნერვიულობის ფასად და საკუთარი ჯანმრთელობის ხარჯზე“, – განაცხადა წულუკიანმა.
კანონის წინაშე ყველა ერთია, მაგრამ სააკაშვილი განსაკუთრებული პატიმარია, რადგან ყველა აკვირდება მის მდგომარეობას და უმაღლესი სტანდარტების შესრულებას მოითხოვს, – ამის შესახებ სალომე ზურაბიშვილმა ორბელიანების სასახლეში გამართულ ბრიფინგზე განაცხადა.