რუსთაველის გამზირზე, პარლამენტთან, „ნაციონალური მოძრაობის“ აქცია გრძელდება. ოპოზიციის წარმომადგენლები ელოდებიან მიხეილ სააკაშვილის გადაწყვეტილებას, დათანხმდება თუ არა ის გორის სამხედრო ჰოსპიტალში მკურნალობას.
მათი თქმით, იმ შემთხვევაშიც, თუ სააკაშვილი მკურნალობას გორში გააგრძელებს, აქციები გორში არ იქნება, თუმცა, პროტესტი მაინც არ შეწყდება. ოპოზიცია ამბობს, რომ ახლა მათი მთავარი მოთხოვნა მიხეილ სააკაშვილის გათავისუფლება იქნება. ამასთან, ისინი ვადამდელ არჩევნებს ითხოვენ.
„ვიდრე მიხეილ სააკაშვილს სჭირდება მკურნალობა, ეს მკურნალობა არის ძალიან სკურპულოზური, ძალიან სახიფათო და მოითხოვს საკმაო დროს, ჩვენ ამ პირობას, რა თქმა უნდა, შევასრულებთ, მაგრამ ერთი წუთით ჩვენ არ შევწყვეტთ ბრძოლას მიხეილ სააკაშვილის საბოლოო გათავისუფლებისთვის, მიხეილ სააკაშვილი იქნება თავისუფალი“, – თქვა სიტყვით გამოსვლისას გიგი უგულავამ.
იუსტიციის სამინისტრო სააკაშვილს გორის სამხედრო ჰოსპიტალში გადაყვანას სთავაზობს.