“მიხეილ სააკაშვილი აქ ციხეში ჩასაჯდომად არ ჩამოსულა, ჩამოვიდა იმისათვის, რომ სახელმწიფო გადატრიალება მოეხდინა”, – ამის შესახებ პარტია „მემარცხენე ალიანსის“ ერთ-ერთმა ლიდერმა, სოსო შატბერაშვილმა მედიაჰოლდინგ “კვირას” პრესკლუბში გამართულ პრესკონფერენციაზე განაცხადა.
შატბერაშვილმა მიმდინარე პოლიტიკური მოვლენები შეაფასა.
„დავიწყოთ ნომერ პირველი ნიუსით, რომლითაც საქართველოს, პრაქტიკულად, ყველა საინფორმაციო საშუალება იწყება: ესაა სააკაშვილის ჯანმრთელობის მდგომარეობა. ქვეყანაში, სადაც 70-დან 80-მდე ადამიანი ყოველდღე კოვიდის გამო იღუპება, პირველ ნიუსად სააკაშვილის ჯანმრთელობის ამბავი გადიოდეს, ჩვენი მოსახლოების შეურაცხყოფაა. მიგვაჩნია, რომ სააკაშვილი არც პატიმარია, მით უმეტეს, პოლიტპატიმარი არაა, არც მოშიმშილეა. ყველამ კარგად ვნახეთ, როგორ მიირთმევს ფაფებს, ღვიძლის პაშტეტს, ნატურალურ წვენებს, ლიმონათს და ა.შ. ისიც კარგად ვნახეთ, როგორ ჯანზეა. პენიტენციური დაწესებულების ერთ-ერთ თანამშრომელს კინაღამ დაარტყა კიდევაც.
სააკაშვილი სანატორიუმში იმყოფება. ის თუ პატიმარია, მაშინ სასჯელს ჩვეულებრივ კამერაში უნდა იხდიდეს, სადაც 4 ან 6 პატიმარია. პირადად უნდა ისმენდეს იმ ლანძღვა- გინებას, რომელიც პატიმრებისგან გისოსებიანი ფანჯრებიდან ესმის. მეტსაც გეტყვით, სააკაშვილი უნდა შეუშვან ე.წ. კანონიერი ქურდების კამერაში, რადგანაც ის ებრძოდა ამ ე.წ. კანონიერ ქურდებს და ახლაც დაამტკიცოს, მათ ფიზიკურად შეებრძოლოს. კიდევ ერთხელ ვიმეორებ, სააკაშვილი არანაირი პატიმარი არ არის. ის აქ ციხეში ჩასაჯდომად არ ჩამოსულა, ყველამ კარგად ვიცით, ფარული თუ ღია ჩანაწერებით, ის ჩამოვიდა იმისათვის, რომ აქ სახელმწიფო გადატრიალება მოეხდინა. არჩევნების მეორე დღეს თვითონვე განაცხადა, 100 000 ადამიანი ვიკრიბებით თავისუფლების მოედანზე, რუსთაველზე და ეს ხელისუფლება უნდა დავამხოთო“, – განაცხადა შატბერაშვილმა.
მისივე თქმით, ქართველ ხალხს რევოლუცია აღარ უნდა.
„მისი მომხრეები დღესაც იმავეს აცხადებენ, სააკაშვილი გარეთ უნდა გამოვიდეს და მშვიდობიანი რევოლუცია უნდა მოეწყოსო. იქნებ, ვინმემ ამიხსნას, რას ნიშნავს “მშვიდობიანი რევოლუცია”. ჩვენ ორი რევოლუცია გადავიტანეთ, ერთი 1991-1992 წლებში, მაშინ ტყვიების ზუზუნი იყო, მეორე რევოლუცია კი 2003 წელს, მართალია, ტყვიები არ იყო, მაგრამ იმიტომ არ იყო, რომ პრეზიდენტი შევარდნაძე ნებაყოფლობით გადადგა და ხელისუფლება თავის აღზრდილებს დაუტოვა. პირველ რევოლუციას სამოქალაქო ომი მოჰყვა, მეორეს – რუსეთთან ომი. ქართველ ხალხს რევოლუცია აღარ უნდა. კიდევაც ჩანს, მელიას მიტინგებზე ხალხი არ გადის. თუ ვინმე დადის, 80-100 ლარს უხდიან, ზოგ შემთხვევაში დასავლეთიდან ჩამოსულ ადამიანებს 200 ლარამდე ანაზღაურება ეძლევათ.
ამიტომ, მიმაჩნია, რომ საკააშვილი გორის ჰოსპიტალში არ უნდა გადაეყვანათ, მისი და ვიღაც სხვა მოშიმშილეების ახირება არ უნდა აესრულებინათ. ამას ძალიან ცუდი შედეგი მოჰყვება. შემდეგი იქნება ის, რომ ეს ე.წ. პოლიტიკოსები ახალი მოთხოვნების დაყენებას და სააკაშვილის გარეთ გამოსვლისთვის ბრძოლას დაიწყებენ. რიგგარეშე საპარლამენტო არჩევნებსაც მოითხოვენ. გუშინ 4 სენატორის წერილი გამოქვეყნდა, რომლებიც სააკაშვილის გორის ჰოსპიტალში გადაყვანასთან დაკავშირებით კმაყოფილებას გამოთქვამენ. ამასთან დაკავშირებით მინდა, ვთქვა, რაკი 4 ამერიკელი სენატორი კმაყოფილია,
ქართველი ხალხი ბედნიერი უნდა იყოს, რადგან ქართველ ხალხს არავინ ეკითხება, სააკაშვილი სად და როგორ მოიხდის სასჯელს. საქართველოს ხელისუფლებას კრიმინალების დაპატიმრება აკრძალული აქვს. ეს გამოჩნდა მაშინ, როცა 3 ე.წ. პოლიტპატიმარი: რურუა, უგულავა და ოქრუაშვილი გარეთ დასავლელი ლობისტების მოთხოვნით გამოუშვეს. საქართველოს მთავრობას კრიმინალების დასჯა აკრძალული აქვს. დარწმუნებული ვარ, როცა სააკაშვილი „მომჯობინდება“ და კარგად გახდება, დასავლელი ლობისტები იზრუნებენ იმისათვის, რომ ის გარეთ გამოვიდეს. თუმცა, მე რამდენიმე დღის წინ ერთ-ერთი საინფორმაიცო საშუალებით გამოვაცხადე, რომ საკააშვილს, ალბათ, გარეთ მართლა გამოუშვებენ, ოღონდ, ჩემი მოსაზრებით, ერთი პირობით – ის საქართველოდან გაძევებული უნდა იქნას. მან უნდა დაწეროს, რომ პოლიტიკას თავს ანებებს, საქართველოსკენ აღარ გამოიხედავს, ის უკრაინაში უნდა იქნას დეპორტირებული, რომელსაც თავის ახალ სამშობლოდ თვლის, რომლის მოქალაქეცაა“, – განაცხადა შატბერაშვილმა.