ეს არის ადამიანი, ვისაც უყვარს საკუთარი თავი, – ამის შესახებ „ქართული ოცნების“ საზოგადოებასთან ურთიერთობის მდივანმა, შალვა პაპუაშვილმა გადაცემაში „იმედი LIVE“ მიხეილ სააკაშვილზე საუბრისას განაცხადა.
„დღეს ვიხილეთ, რომ ეს არის ადამიანი, ვისაც უყვარს ფუფუნება და ვერ ხვდება, რომ ეს ფუფუნება ქვეყნის ხარჯზე არ უნდა ჰქონდეს. დღეს ჩვენ ვნახეთ აღიარება იმისა, რაც დოკუმენტებში არის წარმოდგენილი, მაგრამ ის (სააკაშვილი) ვერ აცნობიერებს, რომ ეს არის დანაშაული. მას (სააკაშვილს) იმდენად საკუთარ ბიუჯეტად და საკუთარ ჯიბის ფულად მიაჩნია ის თანხა, რასაც ჩვენი მოქალაქეები იმ პერიოდში გადასახადების სახით იხდიდნენ, ეს დანაშაულად ვერც კი ჩათვალა. ეს არის ჩვენი გადასახადის გადამხდელი მოქალაქეების დაცინვა, რომლებიც საკუთარი ჯიბიდან იხდიან ფულს“, – განაცხადა შალვა პაპუაშვილმა.
კორუფციულ დანაშაულზე, მიხეილ სააკაშვილის დღევანდელი პროცესი დასრულდა. ექსპრეზიდენტმა სპეციალური პენიტენციური სამსახურის მანქანითა და საპოლიციო ესკორტით უკვე დატოვა ტერიტორია.
დღეს მიხეილ სააკაშვილმა უკმაყოფილება გამოთქვა იმის გამო, რომ პროცესი რამდენიმე წუთის დაგვიანებით დაიწყო და არ მოსწონს ისიც, რომ, როგორც თავად ამბობს, სასამართლოში, რამდენიმე საათით ადრე მიიყვანეს. მან ისევ პოლიტიკური განცხადებები გააკეთა და ნაკლები ისაუბრა წარდგენილ ბრალზე.
7 ნოემბრის დარბევის მსგავსად, სააკაშვილმა 26 მაისის დარბევაზეც მოიხსნა პასუხისმგებლობა. ამჯერად, დარბევა პოლიციელებს დააბრალა. მიხეილ სააკაშვილმა პროკურორს სიტყვიერი შეურაცხყოფა მიაყენა და მას „ბინძური მატყუარა“ უწოდა.