ოკუპირებულ ტერიტორიებიდან იძულებით გადაადგილებულ პირთა და ლტოლვილთა მინისტრ სოზარ სუბარის განცხადებით, ,,ნაციონალური მოძრაობის“ წევრებისგან სიტყვის თავისუფლებაზე საუბარი უხერხულია.
“ბოლო ორი დღის განმავლბაში “ნაციონალური მოძრაობის” წევრები ძალიან ხშირად ახსენებდნენ “რუსთავი 2”-ის თემას. ეს არის დავა კერძო მესაკუთრეებს შორის, რომელთაგან ერთ-ერთს თუ რამდენიმეს მიაჩნდა, რომ ეს ოდესღაც მათ ეკუთვნოდათ ის, უკანონოდ წაართვეს და ახლა ისინი დაობენ. ჩვენ ვერ წავართმევთ მათ უფლებას იდავონ სასამართლოში.
როდესაც პარლამენტის სხდომათა დარბაზში არის ფოტორეპორტიორი გიორგი აბდალაძე და იღებს ფოტოებს, “ნაციონალური მოძრაობის” წევრები აბდალაძეს თვალებში უყურებენ და ამ დროს ლაპარაკობენ სიტყვის თავსუფლებაზე. მინიმუმ უნდა შერცხვეთ და უხერხულად უნდა იგრძნონ თავი. ლაპარაკს არ ვუკრძალავ, მაგრამ ეს უხერხულობა რომ დავინახო მათ თვალებში ვიფიქრებ, რომ რაღაცა შეიძლება ამ ადამიანებს ეშველოთ”, – განაცხადა სოზარ სუბარმა.