„დღეს ალბათ უკანასკნელი ბრძოლა გვექნება… შედეგი ზოგისთვის სიკვდილი, ზოგისთვის კი ტყვეობა იქნება“, – ამის შესახებ ინფორმაცია უკრაინის 36-ე საზღვაო ბრიგადის Facebook-გვერდი ავრცელებს. პოსტის მიხედვით, 36-ე ბრიგადა, რომელიც მარიუპოლს იცავს „უკანასკნელი ბრძოლისთვის“ ემზადება.
გვერდის განცხადებით, საზღვაო ბრიგადა 47 დღე იცავდა მარიუპოლს, თუმცა რესურსები ამოწურვადია და შეუძლებელია უკრაინამ ქალაქი შეინარჩუნოს.
საზღვაო ბრიგადის გვერდის მიერ გავრცელებული განცხადების მიხედვით, არსებობდა შესაძლებლობა, რომ მათ გაერღვიათ ალყა და შეერთებოდნენ უკრაინის ჯარებს, მაგრამ, როგორც განცხადებაშია აღნიშნული, უკრაინის მთავარი შტაბი „დახურული იყო“ მათთვის.
„შეუძლებელია, რომ შევინარჩუნოთ ქალაქის დაცვა. ნებისმიერ რესურსს აქვს ამოწურვის პოტენციალი“, – ნათქვამია გავრცელებულ განცხადებაში.
განცხადებაში აღნიშნულია, რომ მათ მხოლოდ ერთხელ მიიღეს იარაღი და თვეზე მეტი ხნის განმავლობაში ისინი იბრძოდნენ საბრძოლო მასალის შევსების გარეშე, საკვებისა და წყლის გარეშე.
„ისინი, ვისაც კიდურები კვლავ შენარჩუნებული აქვს, ბრძოლაში დაბრუნდებიან. ქვეითები დაიღუპნენ და სროლაში ახლა მონაწილეობენ არტილერიის წევრები, ანტისარაკეტო ძალები, რადიოს ოპერატორები, მძღოლები და მზარეულები, ორკესტრიც კი. თანდათან ვუახლოვდებით დასასრულს“, – წერია განცხადებაში.
მათი თქმით, ალყის გარღვევის შანსები იყო, მაგრამ სისულელეების გამო ვერ განხორციელდა.
„არავის უნდა ჩვენთან კომუნიკაცია, რადგან ჩვენ უკვე განწირული ვართ… დღეს ალბათ უკანასკნელი ბრძოლა იქნება… შედეგი ზოგისთვის სიკვდილი, ზოგისთვის კი ტყვეობა იქნება.
არ ვიცი, რა მოხდება, მაგრამ გთხოვთ, გახსოვდეთ საზღვაო ქვეითები და კეთილი სიტყვით გაიხსენოთ. რაც არ უნდა მოხდეს შემდეგში, ცუდს ნუ იტყვით საზღვაო ქვეითებზე.
მათ გააკეთეს შესაძლებელი და შეუძლებელიც. რადგან ჩვენ სამუდამოდ ერთგულები ვართ. 11.04.2022“, – წერია საზღვაო ქვეითების გვერდის მიერ გავრცელებულ განცხადებაში.