საკონსტიტუციო სასამართლოს შესახებ კანონპროექტი ითარგმნა და, განმარტებით ბარათთან ერთად, ვენეციის კომისიას გადაეგზავნა, – ამის შესახებ განცხადება ეკა ბესელიამ გააკეთა.
მისივე თქმით, კანონპროექტი კომისიაში გუშინ საგარეო საქმეთა სამინისტროს მეშვეობით გადაიგზავნა.
ამასთან, საკონსტიტუციო სასამართლოს შესახებ კანონში ცვლილებების პროექტი პარლამენტმა საქართველოს პრეზიდენტს გუშინ გადაუგზვნა.
პრეზიდენტს მასზე ხელმოსაწერად ან ვეტოს დასადებად 10-დღიანი ვადა აქვს.
ცვლილებების მიხედვით, საკონსტიტუციო სასამართლოს ყველა წევრის ფიცის დადებიდან ან საკონსტიტუციო სასამართლოს თამჯდომარის უფლებამოსილების ვადაზე ადრე შეწყვეტიდან არა უგვიანეს ერთი თვისა, პლენუმის სხდომა ჩატარდება, რომელიც 5-წლის ვადით აირჩევს საკონტიტუციო სასამართლოს თავმჯდომარეს. ამავე წესით აირჩევა ორი მოადგილე. სასამართლოს თავმჯდომარის წარდგენის უფლება თავად საკონსტიტუციო სასამართლოს ექნება – თავმჯდომარის კანდიდატურის არჩევაში აღარ ჩაერთვება პრეზიდენტი, პარლამენტის თავმჯდომარე და უზენაესი სასამარლოს თავმჯდომარე და კანდიდატურას თავად საკონსტიტუციო სასამართლოს მოსამართლეები წარადგენენ. ამასთან, საკონსტიტუციო სასამართლოს თავმჯდომარედ ან მის მოადგილედ არ შეიძლება აირჩეს პირი, მეორე ვადით. კიდევ ერთი საკითხი იმ მოსამართლეებს შეეხებათ, რომელთაც კონსტიტუციური უფლებამოსილების 10-წლიანი ვადა ეწურებათ. სიახლეა ისიც, რომ 2/3-მდე იზრდება საკონსტიტუციო სასამართლოს პლენუმის მიერ გადაწყვეტილების მიღების კვორუმი. გარდა ამისა, მეორე მოსმენით მიღებულ ვარიანტში განისაზღვრა, რომ საკონსტიტუციო სასამართლოს გადაწყვეტილება ძალაში მისი სრულად გამოცხადებისა და სასამართლოს ვებგვერდზე ატვირთვის შემდეგ შევა.