ფინანსთა სამინისტროს შემოსავლების სამსახურს აზერბაიჯანის რესპუბლიკის სახელმწიფო საგადასახადო სამსახურის მომსახურების დეპარტამენტის უფროსის ელჩინ მამადოვის ხელმძღვანელობით წარმომადგენლობითი დელეგაცია ესტუმრა, – ამის შესახებ ინფორმაციას ფინანსთა სამინისტროს შემოსავლების სამსახური ავრცელებს.
მათივე ინფორმაციით, შეხვედრის ფარგლებში, აზერბაიჯანის დელეგაციის წევრებმა შემოსავლების სამსახურის წარმატებული რეფორმების შესახებ პრეზენტაცია მოისმინეს და ფიზიკურ პირთა რეგისტრაციის, ასევე ელექტრონული სერვისების გამოყენების, დეკლარაციების კამერალური შემოწმებისა და გადასახადის გადამხდელთა მხრიდან საგადასახადო კანონმდებლობასთან ნებაყოფლობითი შესაბამისობის შეფასების კრიტერიუმები განიხილეს.
მხარეებმა კიდევ ერთხელ აღნიშნეს, რომ არსებობს ყველა შესაძლებლობა, რათა უფრო აქტიური იყოს ორი ქვეყნის ბიზნეს-სექტორის წარმომადგენლებს შორის თანამშრომლობა.
შეხვედრას, ასევე ესწრებოდნენ შემოსავლების სამსახურის მომსახურების დეპარტამენტის უფროსი ლევან დგებუაძე და ამავე დეპარტამენტის სხვადასხვა სამმართველოს წარმომადგენლები.
შეხვედრის დასრულების შემდეგ, აზერბაიჯანის რესპუბლიკის სახელმწიფო საგადასახადო სამსახურის წარმომადგენლებმა ვაკე-საბურთალოს მოქალაქეთა მომსახურების სერვისცენტრი დაათვალიერეს და რეგისტრაციის პროცედურებს ადგილზე გაეცნენ.