„რესპუბლიკური პარტიის“ ერთ-ერთი ლიდერის დავით ბერძენიშვილის განცხადებით, თუ საქართველოს პრეზიდენტი „საკონსტიტუციო სასამართლოს შესახებ“ კანონს ვეტოს დაადებს, „რესპუბლიკელები“ ვეტოს დაძლევაში მონაწილეობას არ მიიღებენ.
როგორც დავით ბერძენიშვილმა ჟურნალისტებს განუცხადა, „საკონსტიტუციო სასამართლოს შესახებ“ კანონი ვენეციის კომისიას უკვე გადაგზავნილი აქვს.
„რაც შეეხება ოპერატიულობას, არ ვიცი რა ვადაში განიხილავს ვენციის კომისიას ამ კანონპროექტს.
არც კორექტულია და არც სწორია, ახლა პოლიტიკურმა ძალებმა უმრავლესობაში იქნებიან თუ ოპოზიციაში, პრეზიდენტს მიუთითონ როგორ მოიქცეს. ეს მისი დისკრეციაა და თავად განსაზღვრავს. თუ ვეტო იქნება „რესპუბლიკელები“ ვეტოს დაძლევაში მონაწილეობას არ მივიღებთ, იმიტომ რომ ჩვენ კანონს მხარი არ დავუჭირეთ”, – განაცხადა დავით ბერძენიშვილმა.
რაც შეეხება კითხვას რა არის კანონში უარყოფითი რის გამოც „რესპუბლიკელებმა“ კანონს მხარი არ დაუჭირეს, დავით ბერძენიშვილი ამბობს, რომ არ შეიძლება პლენუმმა წაიღოს ფაქტობრივად კოლეგიის უფლებოსილებები და ამასთანავე, პრაქტიკულად პარალიზებული იყოს საკონსტიტუციო სასამართლოს მიერ გადაწყვეტილებების მიღება მაღალი კვორუმით.
„რესპუბლიკელები“ ვცდილობდით, რომ ეს კანონი გაუმჯობესებულიყო, მაგრამ ამის ნაცვლად რამდენიმე მუხლი გაუარესებისკენ არის. ის რომ ცხრა კაციდან ხუთ კაცს შეუძლია გადაწყვეტილების მიღება, არის უკეთესი, ვიდრე ის, რომ ცხრა კაციდან ექვს კაცს არ შეეძლოს გადაწყვეტილების მიღება. ეს ცვლილებები პრინციპში გამიზნულია საკონსტიტუციო სასამართლოს მიერ გადაწყვეტილებების ვერ მიღებისთვის”, – განაცხადა დავით ბერძენიშვილმა.