ჯანდაცვის მინისტრმა დავით სერგეენკომ ქვეყნის მასშტაბით სეზონური ვირუსით გამოწვეულ მდგომარეობაზე ისაუბრა და საზოგადოებას რამდენიმე რეკომენდაციით მიმართა.
ჯანდაცვის სამინისტროში გამართულ ბრიფინგზე სერგეენკომ მოსახლეობას გრიპის სიმპტომების აღმოჩენისას ოჯახის ექიმებთან მისვლა ურჩია.
მინისტრის თქმით, სასწრაფო – სამედიცინო ცენტრებში გრიპის ვირუსით დაინფიცირებულ პაციენტთა მაღალი მიმართვიანობაა, ამიტომაც სამინისტროს გადაწყვეტილებით, ახალი სადისპეჩეროები შეიქმნება, სადაც გრიპის ვირუსის მქონე პაციენტები გადამისამართდებიან.
“გაზრდილი არის მიმართვიანობა სასწრაფო დახმარების სამსახურებში. გუშინდელი მდგომარეობით 500-ზე მეტი ზარი დაფიქსირდა, რომელზეც რეაგირება ვერ მოხერხდა. გამოძახებების უმეტესობა იყო გრიპის სიმპტომების გამო. ჯანდაცვის სამინისტროს გადაწყვეტილებით, დღესვე შეიქმნება ახალი სადისპეჩერო, სადაც გადამისამართდება ასეთი ჩივილების მქონე გამოძახებები და უკვე ამ დაავადებების მართვას განახორციელებენ ოჯახის ექიმები.
დამატებით გაიხსნება საოჯახო ცენტრები, რომლებიც 24/7 საათის განმავლობაში იმუშავებენ. ეს იქნება ქმედითი ზომები იმისათვის, რომ გაზრდილი ავადობის სურათი მნიშვნელოვნად ვმართოთ და შევამციროთ. იმ პერიოდში, როდესაც მუშაობს პირველადი დახმარების ოჯახის ექიმები გრიპის სიმპტომების აღმოჩენისას სწორედ ოჯახის ექიმს მიმართონ და არა სასწრაფო დახმარების ცენტრებს. ეს ოჯახის ექიმის კომპეტენციაა”,-განაცხადა ჯანდაცვის მინისტრმა და დასძინა, რომ გრიპის ვირუსის პრევენციისთვის ხელების სისუფთავეს უდიდესი მნიშვნელობა აქვს.
ამასთან, მინისტრის თქმით, ბაღებსა და სკოლებში ხვალიდან სტანდარტული პროტოკოლი ამოქმედდება. როგორც სერგეენკომ აღნიშნა, როდესაც ყოველდღიური შეტყობინების საფუძველზე, ბავშვების არდასწრება 40%-ს აღემატება, ასეთი დაწესებულება დაიკეტება 3 დღის განმავლობაში.