“112 ჯანდაცვის სამინისტროსთან ერთად მუშაობს, რათა გაზრდილი გამოძახებების პრობლემა სწრაფად მოგვარდეს“

112 -ის დირექტორის გიორგი ბიჭაშვილის თქმით, გადაუდებელი დახმარების ოპერატიული მართვის ცენტრი ჯანდაცვის სამინისტროსთან ერთად მუშაობს, რათა გრიპის ვირუსების გამო გაზრდილი გამოძახებების პრობლემა სწრაფად მოგვარდეს.
მისი თქმით, მიმდინარეობის ტექნიკური საკითხების მოგვარებაზე მუშაობა.
როგორც ბიჭაშვილმა აღნიშნა, პირველ ეტაპზე თბილისის რამდენიმე კლინიკაში მოხდება შემოსული ზარების გადამისამართება, რათა მოხდეს სასწრაფო – სამედიცინო ზარების განტვირთვა.
„გადამისამართება ნიშნავს იმას, რომ როდესაც ზარი დარეგისტრირდება ეს მონაცემები უშუალოდ იმ კლინიკას მიუვა, რომელმაც უნდა მოახდინოს ამაზე რეაგირება. იგივე პრინციპმა შარშან მოგვცა ძალიან კარგი შედეგი. სასწრაფო განიტვირთა და წელსაც იგივე შედეგს ველოდებით”,– განაცხადა ბიჭაშვილმა.
ჯანდაცვის მინისტრმა, დავით სერგეენკომ ქვეყნის მასშტაბით სეზონური ვირუსით გამოწვეულ მდგომარეობაზე ისაუბრა და საზოგადოებას რამდენიმე რეკომენდაციით მიმართა.
ჯანდაცვის სამინისტროში გამართულ ბრიფინგზე სერგეენკომ მოსახლეობას გრიპის სიმპტომების აღმოჩენისას ოჯახის ექიმებთან მისვლა ურჩია.
მინისტრის თქმით, სასწრაფო – სამედიცინო ცენტრებში გრიპის ვირუსით დაინფიცირებულ პაციენტთა მაღალი მიმართვიანობაა, ამიტომაც სამინისტროს გადაწყვეტილებით, ახალი სადისპეჩეროები შეიქმნება, სადაც გრიპის ვირუსის მქონე პაციენტები გადამისამართდებიან.