რუსეთთან მოლაპარაკებებში უკრაინული დელეგაციის წევრები ამბობენ, რომ დასავლეთის მიერ სანქცირებულმა რუსმა ოლიგარქმა, რომან აბრამოვიჩმა რუსეთ-უკრაინის მოლაპარაკებებში ძალიან მნიშვნელოვანი როლი შეასრულა. ამის შესახებ დმიტრო გორდონთან ინტერვიუში უკრაინის პრეზიდენტის ოფისის ხელმძღვანელის მრჩეველმა, ალექსეი არესტოვიჩმა განაცხადა.
„მე ვფიქრობ, რომ ვლადიმერ პუტინსა და ვოლოდიმირ ზელენსკის შორის მთავარი შუამავალი ახლა რეჯეფ თაიფ ერდოღანია. მე ზუსტად არ ვიცი, მაგრამ ასეთი შთაბეჭდილება მრჩება. რუსეთთან მოლაპარაკებებში მონაწილე ჩვენი დელეგაცია ძალიან აქებს რომან აბრამოვიჩს. ისინი ამბობენ, რომ მან მოლაპარაკებებში ძალიან მნიშვნელოვანი როლი შეასრულა. რაში მდგომარეობს ეს როლი, მე არ ვიცი“, – ამბობს არესტოვიჩი.
ჟურნალისტის კითხვაზე, როგორ შეიძლება პუტინის ადამიანმა უკრაინისთვის ძალიან მნიშვნელოვანი როლი შეასრულოს, არესტოვიჩმა განაცხადა, რომ „აბრამოვიჩი არის პუტინის ადამიანი, რომელიც დიდი ხანია ბრიტანეთში ცხოვრობს და პირადად დაინტერესებულია, რომ მოლაპარაკებები წარმატებული იყოს“.