„ტურისტული გზების მშენებლობა და რეაბილიტაცია რეგიონებში ტურიზმის განვითარებას ხელს შეუწყობს“, – განაცხადა პირველმა ვიცე-პრემიერმა, ფინანსთა მინისტრმა დიმიტრი ქუმსიშვილმა 2017 წლის ბიუჯეტის განხილვისას. მისი განცხადებით, ამით როგორც უცხოელ, ისე ადგილობრივ ტურისტებს შესაძლებლობას მივცემთ დაათვალიერონ საქართველოს ღირშესანიშნაობები და იმოგზაურონ უსაფრთხოდ და იოლად.
დიმიტრი ქუმსიშვილის ინფორმაციით, ბიუჯეტით 10 მილიონი ლარია გამოყოფილი სნო-ჯუთა-როშკა-შატილი-ომალო-ხადორის ხეობა – ბაწარა – ახმეტის მიმართულებით საავტომობილო გზების რეკონსტრუქცია – მშენებლობისთვის. გარდა ამისა, დაფინანსდება საჩხერე-ზემო რაჭის საავტომობილო გზის არეკონსტრუქციო სამუშაოები 10 მილიონი ლარის ოდენობით.
პირველმა ვიცე-პრემიერმა განსაკუთრებული ყურადღება გაამახვილა ბაღდათი – აბასთუმნის საავტომობილო გზის რეკონსტრუქცია-რეაბილიტაციაზე, რომელიც ითავლისწინებს 70 კმ-ის გზას, რომლის მეშვეობითაც გაიზრდება ქუთაისის, როგორც ტურისტული ჰაბის ფუნქცია, გარდა ამისა, გაადვილდება ტურისტებისთვის აბასთუმანში მოხვედრა ამჯერად დასავლეთ საქართველოდან. ამ მიზნით, ბიუჯეტში 15 მილიონი ლარის გამოყოფაა გათვალისწინებული.
დიმიტრი ქუმსიშვილმა უდიდესი მნიშვნელობა მიანიჭა დევდორაკის გვირაბის მშენებლობის საკითხს, როგორც საქართველოს სატრანზიტო ფუნქციის შენარჩუნებისთვის აუცილებელ გარემოებას. ბიუჯეტიდან ასევე გათვალისწინებულია სტეფანწმინდა-სამების ეკლესია საავტომობილო გზის რეკონსტრუქცია-მშენებლობისთვის 8 მლნ ლარის გამოყოფა. 2017 წლისბიუჯეტით ასევე მოხდება ბათუმი (ანგისა) – ახალციხის საავტომობილო გზის ხულო-ზარზმის მონაკვეთის რეაბილიტაცია-რეკონსტრუქცია, რაც 24 მილიონი ლარი დაჯდება და მნიშვნელოვნად გააადვილებს ტურისტებისა და ადგილობრივი მოსახლეობის მიმოსვლას გოდერძის კურორტზე.
