საქართველოს ექსპრეზიდენტი, პატიმრობაში მყოფი მიხეილ სააკაშვილი, რომელიც ამჟამად მკურნალობის ეტაპს კლინიკა “ვივამედში” გადის, განცხადებას აქვეყნებს, სადაც უკრაინის შესახებ საუბრობს. სააკაშვილი წერს, რომ მას უშუალოდ სურს უკრაინის თავისუფლებისთვის ბრძოლაში მონაწილეობა.
ტექსტი სააკაშვილის ოფიციალურ გვერდზე “ფეისბუქში”, უკრაინულ ენაზე გამოქვეყნდა.
“საქართველოში, ტყვეობაში ვარ, მაგრამ ჩემი გული უკრაინაშია. ჩემი ჯანმრთელობა შერყეულია, მაგრამ მინდა, რომ ჩემმა უკრაინელმა თანამემამულეებმა იცოდნენ, რომ სულიერად და ფიზიკურად მეხმარება ჩვენი ჯარისკაცების გმირობა, ხალხის ერთიანობა, პრეზიდენტ ზელენსკის ხელმძღვანელობა, მთელი მსოფლიოს მხარდაჭერა უკრაინისადმი და ჩემი უსაზღვრო რწმენა გამარჯვებისადმი.
მსურს უკრაინის თავისუფლება და მინდა უშუალოდ მივიღო მონაწილეობა ბრძოლაში და დარწმუნებული ვარ, რომ უკრაინელები თავისიანს არ მიატოვებენ და ვემახსოვრები”, – წერს მიხეილ სააკაშვილი.
აღსანიშნავია, რომ მიხეილ სააკაშვილის ადვოკატები ბოლო პერიოდში საუბრობენ იმის შესახებ, რომ ექსპრეზიდენტი სრულად ჩამოშორდა ქართულ პოლიტიკას, მის ოფიციალურ გვერდზეც სოციალურ ქსელში აღარ ქვეყნდება პოლიტიკური შინაარსის განცხადებები, მით უფრო საქართველოს შესახებ.
https://www.ambebi.ge/