დაჭრილი პატიმრის, გურამ სვანიძის დედის, ნათია შენგელიას განცხადებით, მისი შვილის ჯანმრთელობის მდგომარეობა მძიმეა.
„სასწაული თუ გადამირჩენს, თორემ რეალობა რაც არის, ყველამ ძალიან კარგად ვიცით. ძალიან მძიმედაა, კრიტიკულია და ცუდისთვის შემამზადეს“, – განაცხადა შენგელიამ “კურიერთან” საუბრისას.
ცნობისთვის, დაჭრილი პატიმრის ოჯახის ინფორმაციით, კლინიკაში მოთავსებულ პატიმარს თავში ცეცხლსასროლი იარაღით მიყენებული ჭრილობა აღენიშნება. პატიმრის დედის თქმით, პატიმრობაში მყოფი მისი შვილი გლდანის ციხიდან თბილისის ფსიქიკური ჯანმრთელობის ცენტრში გადაიყვანეს, მოგვიანებით კი განუცხადეს, რომ მის შვილს თავში ჭრილობა აღენიშნება.
ამასთან, სპეციალური საგამოძიებო სამსახურის მიერ გავრცელებული განცხადების თანახმად, გამოძიების ხელთ არსებული მასალებით დგინდება, რომ 2022 წლის 20 აგვისტოს, დილის საათებში, სმენის გადაბარების დროს ბრალდებული პატიმარი გ.ს. უკნიდან მიეპარა სპეციალური პენიტენციური სამსახურის პენიტენციური დეპარტამენტის ესკორტირებისა და სპეციალური ღონისძიებების მთავარი სამმართველოს თანამშრომელს, რომელსაც ამოაცალა სამსახურებრივ-საშტატო ცეცხლსასროლი იარაღი და უმისამართოდ ერთი გასროლა განახორციელა, რის შემდეგაც ესკორტირების სამმართველოს თანამშრომლების მისამართით განახორციელა მეორე გასროლა (გასროლის შედეგად არავინ დაზარალებულა). ამის შემდეგ, იმავე იარაღიდან თავის არეში მიიყენა დაზიანება.
უწყების ცნობითვე, საქმეზე გამოძიება საქართველოს სისხლის სამართლის კოდექსის 342-ე მუხლის მე-2 ნაწილით მიმდინარეობს, რაც გულისხმობს სამსახურებრივ გულგრილობას, რამაც მძიმე შედეგი გამოიწვია.