საპატრიარქოში უნიკალური გამოცემის, ქართველთა საუკუნის ტრილოგიის – “ნათელი ქრისტესი. საქართველო” მე-3 ტომის პრეზენტაცია გაიმართა.
წიგნის პრეზენტაციას პრეზიდენტის ადმინისტრაციის წარმომადგენლები და სამეცნიერო-აკადემიური საზოგადოების წარმომადგენლები ესწრებოდნენ.
მესამე ტომის სახელწოდებაა “მზიანი ღამე. პატრიარქი”.
ტრილოგიის იდეის ავტორი სრულიად საქართველოს კათოლიკოს-პატრიარქი, ილია მეორეა. პროექტის ავტორი და მთავარი რედაქტორი კი, ისტორიის მეცნიერებათა დოქტორი, პროფესორი ნესტან კირთაძეა.
“ეს ტრილოგია გამოხატავს ჩვენს ინტელექტს, ჩვენს პოტენციალს. რა შეუძლია ქართველს გააკეთოს. როგორი დონეა ჩვენი აზროვნების. მართლაც შედეგი ჩვენს წინაშეა და ეს შედეგი საოცარია. მე მინდა მადლობა მოგახსენოთ ყველას, ვინც იშრომა და მოგიწოდებთ ყველას, ეს იყოს მხოლოდ დასაწყისი და ვიფიქროთ მომავალზე”, – აღნიშნა კათოლიკოს პატრიარქმა ილია მეორემ.
ტრილოგია 16 წლის განმავლობაში იქმნებოდა. მასზე მუშაობა 2000 წელს დაიწყო. პირველი ტომი -2003 წელს, მეორე ტომი კი 2006 წელს გამოიცა.
ქართველთა საუკუნის ტრილოგიაში შესულია უნიკალური ხელნაწერები, ექსკლუზიური ფოტორეპროდუქციები, არქიტექტურული და სხვა სახელოვნებო ნიმუშები.