სინოპტიკოსების განცხადებით, საქართველოს ზოგიერთ რაიონში, ტემპერატურა 40 გრადუსამდე იქნება. გარემოს ეროვნული სააგენტოს პროგნოზით, ქარიანი ამინდები 29 აგვისტომდე გაგრძელდება, რაც მაღალმთიან რაიონებში ხანძრების გაჩენის რისკებს ზრდის. ამ ფონზე, საგანგებო სიტუაციების მართვის სამსახური, შესაძლო გართულებების თავიდან ასაცილებლად, საზოგადოებას მაღალი სამოქალაქო პასუხისმგებლობისკენ მოუწოდებს.
„როგორც დასავლეთ, ისე აღმოსავლეთ საქართველოში მოსალოდნელია უმეტესად ცხელი და უნალექო ამინდები. კოლხეთის დაბლობზე, ზემო იმერეთში, გომბორი-სურამის მონაკვეთზე, მთიანი რეგიონების ზოგიერთ რაიონში ქარის გაძლიერებაა მოსალოდნელი. დასავლეთ საქართველოს დაბლობებში ველოდებით, 40 გრადუსამდე ტემპერატურას. დედაქალაქში უნალექო ამინდი იქნება და ტემპერატურა 33 გრადუსამდე იქნება. ძლიერი ქარი მთიან რაიონებში ტყის ხანძრების გაჩენის რისკს ზრდის“, – აცხადებს გარემოს ეროვნული სააგენტოს სინოპტიკოსი მზიური მამარდაშვილი.
საგანგებო სიტუაციების მართვის სამსახური მოსახლეობას მოუწოდებს, არ დაანთოს ცეცხლი სასოფლო სამეურნეო სავარგულებზე, ტყის ან ველის სიახლოვეს და არ დატოვოს ცეცხლის კერები უყურადღებოდ. გასათვალისწინებელია, რომ შესაძლებელია საყოფაცხოვრებო ნარჩენების თვითაალება. დაკვამლიანების ან ცეცხლის შემჩნევის შემთხვევაში, მოქალაქეებმა დაუყოვნებლივ უნდა აცნობონ 112-ს.