საქართველოს პირველი ლედი მაკა ჩიჩუა „სოციალური სოლიდარობის ორდენით“ დააჯილდოეს. წელს დაარსებული ორგანიზაციის – „სრულიად საქართველოს ღვთისშვილთა კავშირი“ – გადაწყვეტილებით, “სოციალური სოლიდარობის ორდენით” ჯილდოვდებიან პირები, ან ორგანიზაციები, რომელთაც განსაკუთრებული პიროვნული ან ორგანიზაციული წვლილი მიუძღვით როგორც ტრადიციული, ასევე ორგანული სოციალური სოლიდარობის მიმართულებით.
როგორც მაკა ჩიჩუამ განაცხადა, ორდენი ახალი სტიმულია და ყველა უნდა გაერთიანდეს გზავნილით – „ჩვერ ვაძლიერებთ ერთმანეთს“.
„ორდენი, ალბათ სტიმულია ისეთი საქმიანობისათვის, რომელსაც „სრულიად საქართველოს ღვთისშვილთა კავშირი“ ახორციელებს. ჩემთვის მნიშვნელოვანია ამ ადამიანების ერთად ყოფნა. უნდა გავერთიანდეთ სწორედ ამ გზავნილით – ჩვენ ვაძლიერებთ ერთმანეთს“, – განაცხადა მაკა ჩიჩუამ.საქართველოს პირველ ლედის ორდენი ორგანიზაციის პრეზიდენტმა ნონა კენჭუაშვილი-სიხარულიძემ პირადად გადასცა. მისი განცხადებით, პირველ ლედის თანადგომა შეზღუდული შესაძლებლობების მქონე პირების მიმართ საზოგადოების აღტაცებას იწვევს და მისი ორგანიზაციისთვის საპატიოა მაკა ჩიჩუას ორდენით დაჯილდოება.
„პირველი ლედი არა მარტო აქტიურად არის ჩართული შეზღუდული შესაძლებლობების პირთა, განსაკუთრებით, ამ კატეგორიის ბავშვთა და მოზარდთა პრობლემების განხილვაში, არამედ, უშუალო, ღია კომუნიკაცია აქვს მათთან. მის მიერ გამოხატული განწყობა, დამოკიდებულება და თანადგომა ფიზიკურად, გონებრივად, მენტალურად შეზღუდული, თუ სოციალურად შეჭირვებული პირების მიმართ, საზოგადოების აღტაცებას იწვევს. ჩვენი ორგანიზაციისათვის საპატიო და საამაყოა, მადლიერების ნიშნად მაკა ჩიჩუას გადასცეს სოციალური სოლიდარობის ორდენი“, – განაცხადა ნონა კენჭუაშვილი-სიხარულიძემ.
ღონისძიების ფარგლებში წარმოდგენილი იყო “ღვთისშვილთა კავშირის სასწავლო-შემოქმედებითი ცენტრის” შრომითი თერაპიის კაბინეტსა და შემოქმედებით სახელოსნოში შეზღუდული შესაძლებლობების მქონე პირთა ნახატები, ხელნაკეთი სამკაულები, აპლიკაციები, საახალწლო აქსესუარები, თიხის ნაკეთობები, თექის პანოები და შარფები.
საქართველოს პირველმა ლედიმ გამოფენილი ნამუშევრები დაათვალიერა და ღონისძიების მონაწილეებთან სამახსოვრო ფოტოები გადაიღო.