26 აგვისტოს, ქალაქ ცაგერში, მსოფლიო მართლმადიდებელი სამყაროს უდიდესი წმინდანის, მაქსიმე აღმსარებლის ხსენების დღე „მაქსიმობა“ აღინიშნა.
საზეიმო წირვა ცაგერის ღვთისმშობლის მიძინების სახელობის საკათედრო ტაძარში ჭყონდიდის, ცაგერისა და ლენტეხის მიტროპოლიტმა სტეფანემ აღავლინა.
წირვის დასრულების შემდეგ სასულიერო პირებმა და მრევლმა მურის კლდეკარში, წმინდა მაქსიმე აღმსარებლის მონასტერში გადაინაცვლეს, სადაც წმინდანის წმინდა ნაწილებია დაკრძალული. აღევლინა პარაკლისი.
სადღესასწაულო ღონისძიებას მრევლთან და რაჭა-ლეჩხუმ-ქვემო სვანეთის სახელმწიფო რწმუნებულთან, პაპუნა მარგველიძესთან, სახელმწიფო რწმუნებულის პირველ მოადგილესთან ქრისტინე კობახიძესთან, საკრებულოს თავმჯდომარესთან, ჭაბუკი ჭაბუკიანთან და ადგილობრივი ხელისუფლების წარმომადგენლებთან ერთად ვესწრებოდი.
საზეიმო ღონისძიებას ესწრებოდა სამეგრელო- ზემო სვანეთის მხარის რწმუნებული გიორგი გუგუჩია.
ჭყონდიდის, ცაგერისა და ლენტეხის მიტროპოლიტ სტეფანესთან ერთად იმყოფებოდნენ: მარგვეთისა და უბისის ეპისკოპოსი მელქისედეკი, თიანეთის და ფშავ-ხევსურეთის ეპისკოპოსი მიქაელი, საჩხერე-ჭიათურის მიტროპოლიტი დანიელი, გორისა და ატენის მიტროპოლიტი ანდრია, ზუგდიდისა და ცაიშის მიტროპოლიტი გერასიმე, ნიკორწმინდის ეპისკოპოსი ვახტანგი, მაღალყოვლადუსამღვდელოესი მიტროპოლიტი სერაფიმე, ქუთათელ-გაენათელი მიტროპოლიტი იოანე.
“თუ გონების დანიშნულება შემეცნების განათლებაა, ხოლო ეს ნათელი კი ღვთის სიყვარულით იბადება, მაშინ კარგად უთქვამთ, რომ არაფერია ღვთიურ სიყვარულზე დიადი”.-წმინდა მაქსიმე აღმსარებელი
წმინდა მაქსიმე ფარავდეს სრულიად საქართველოს!