საქართველო სწრაფად ვითარდება. მსურს, ვურჩიო ახალგაზრდებს, რომ განაგრძონ შესაძლებლობების მოძიება თავიანთ ქვეყანაში – აღნიშნულის შესახებ საქართველოში ვიზიტად მყოფმა ბელგიის სამეფოს სახელმწიფო მდივანმა ნიკოლ დე მურმა განაცხადა.
ბელგიის მთავრობის წარმომადგენელთან ერთად დღეს შინაგან საქმეთა მინისტრის მოადგილემ ალექსანდრე დარახველიძემ ერთობლივი პრესკონფერენცია გამართა, რომელზეც ევროკავშირსა და შენგენის სივრცეში უვიზო მიმოსვლასთან დაკავშირებული საკითხები განიხილეს.
„საქართველო სწრაფად ვითარდება. მსურს, ვურჩიო ახალგაზრდებს, რომ განაგრძონ შესაძლებლობების მოძიება თავიანთ ქვეყანაში, აქ არსებობს შესაძლებლობები და ბელგიაში ცხოვრება კი ყოველთვის იოლი არ არის. მინდა მადლობა გადავუხადო ქართულ მხარეს და მინისტრს მიგრაციის საკითხებში ეფექტიანი თანამშრომლობისთვის, – განაცხადა ნიკოლ დე მურმა.