„ქართული ოცნება – დემოკრატიული საქართველოს“ სხდომიდან გამოსულმა ლუკა კურტანიძემ განაცხადა, რომ დავით კოღუაშვილის განცხადება მისთვის მიუღებელია.
“რა განცხადებაც ბატონმა დავით კოღუაშვილმა გააკეთა, ჩემთვის მიუღებელია და ყოველთვის მიუღებელი იქნება. ამიტომ, თავისი განცხადებებიდან გამომდინარე, არჩევანი თავად უნდა გააკეთოს. მე მგონია, მას ღირსება არ აკლია და ღირსეულ გადაწყვეტილებას თვითონ მიიღებს”, – განაცხადა ლუკა კურტანიძემ.
“ქართული ოცნების” პოლიტსაბჭოს წევრმა, დავით კოღუაშვილმა “ქართული გაზეთი”-სთვის მიცემულ ინტერვიუში ყოფილი ხელისუფლების მაღალჩინოსნებთან დაკავშირებით ისაუბრა და აღნიშნა, რომ ვანო მერაბიშვილი გარემოების მძევალია, გიგი უგულავას კი, ქვეყნისთვის გაცილებით მეტი სიკეთის მოტანა შეუძლია გარეთ, ვიდრე საკანში.
“არ მგონია, რომ უგულავამ კიდევ დიდხანს დაყოს ციხეში და ვისურვებდი, მალე დაუბრუნდეს ოჯახს. მას შეუძლია გაცილებით მეტი სიკეთე მოუტანოს ქვეყანას გარეთ, ვიდრე საკანში. მერაბიშვილიც ძალიან ნიჭიერი ადამიანია. უბრალოდ, ის გახდა იმ გარემოებების მძევალი, რაც მას დაატეხა მისმა მეუღლემ. ვგულისხმობ გირგვლიანის საქმეს”, – განაცხადა დავით კოღუაშვილმა.