საპარლამენტო უმრავლესობის წევრი, რატი იონათამიშვილი უკრაინაში მებრძოლი “ნაცმოძრაობის” მხარდამჭერის, ნოდარ ყარალაშვილის ვიდეომიმართვას გამოეხმაურა.
იონათამიშვილის შეფასებით, „ნაციონალურ მოძრაობას“ საკუთარი ქვეყნის სიძულვილი ბუმერანგივით უბრუნდება.
„ცხადია, ეს განცხადება უფრო კომიკური ჟანრისაა, თუმცა ჩემთვის ყველაზე საინტერესო არის „ნაცმოძრაობის“ რეაქცია. თუ ისინი არ ემიჯნებიან, რასაც ჩვენ ვხედავთ რეალურად, ეს ნიშნავს, რომ ისინი იზიარებენ ამ ადამიანის განცხადებას. ჩვენი საზოგადოება ზუსტად ხედავს, ვინ არის „ნაციონალური მოძრაობა“, რა მიზნები და ამოცანები აქვს. ეს ბატონი სწორედ მათ ოცნებებს ახმოვანებს სინამდვილეში, მაგრამ კარგია ის, რომ „ნაცმოძრაობას“ ბუმერანგივით უბრუნდება უკან საკუთარი ქვეყნის სიძულვილი“, – განაცხადა იონათამიშვილმა.
ცნობისთვის, ნოდარ ყარალაშვილი Facebook-ზე გავრცელებულ ვიდეომიმართვაში აცხადებს: „თუ გინდათ, მე ჩამოვალ სადაც გინდათ, ოღონდ საქართველოში არა. საქართველოში მე ასე არ შემოვალ, საქართველოში შემოვალ ტანკებით, ტანკებით შემოვალ აფხაზეთის მხრიდან. იმიტომ გითხარით, გადაგივლით, დრო მოვა, გადაგივლით”.