“ქვეყანას სააკაშვილი აყანყალებს თავისი თანამებრძოლების დახმარებით, რომლებსაც ასეთი ფორმით უნდათ ხელისუფლებაში დაბრუნება”,– ასე ეხმაურება საპარლამენტო უმრავლესობის წევრი, გიორგი ცაგარეიშვილი უკრაინაში მებრძოლი “ნაცმოძრაობის” მხარდამჭერის, ნოდარ ყარალაშვილის ვიდეომიმართვას.
მისივე თქმით, ყველამ უნდა იცოდეს, რომ მსგავს განცხადებებზე საზოგადოების რეაგირება შესაბამისი იქნება.
„მათი ხელისუფლებაში მობრუნების ერთადერთი გზა გადის სამოქალაქო დაპირისპირებაზე, არეულობაზე. როცა ქართველებს ემუქრები, რომ ტანკებით გადაუვლი, შემოხვალ აფხაზეთიდან თუ სხვა კუთხიდან, დაარბევ, მოსპობ და დახოცავ ხალხს, ყოველთვის უნდა იცოდე, რომ შესაბამის პასუხს მიიღებ აუცილებლად საზოგადოებისგან. ქვეყანას სააკაშვილი აყანყალებს თავისი თანამებრძოლების დახმარებით, რომლებსაც ასეთი ფორმით უნდათ ხელისუფლებაში დაბრუნება და სააკაშვილის ისევ გამეფება და ტახტრევანზე აყვანა“, – აცხადებს ცაგარეიშვილი.
ნოდარ ყარალაშვილი Facebook-ზე გავრცელებულ ვიდეომიმართვაში აცხადებს: „თუ გინდათ, მე ჩამოვალ სადაც გინდათ, ოღონდ საქართველოში არა. საქართველოში მე ასე არ შემოვალ, საქართველოში შემოვალ ტანკებით, ტანკებით შემოვალ აფხაზეთის მხრიდან. იმიტომ გითხარით, გადაგივლით, დრო მოვა, გადაგივლით”.