საქართველოში არ არის იმის განცდა, რომ ახლა ვინმე მიხეილ სააკაშვილს წამლავს; არც ამის მტკიცებულებებია, რომელიც მე ამაში დამარწმუნებდა – მიუხედავად ამისა, ჩემთვის პატივსაცემი ძალიან ბევრი ადამიანი საერთაშორისო არენაზე ამ თემაზე საუბრობს, როგორც დადასტურებულ ფაქტზე. ეს ხომ, როგორც მინიმუმ, შეცდომაა – ასეთ ბრალდებას სჭირდება დამაჯერებელი პასუხი, – ამის შესახებ „ქრონიკის“ ეთერში „გირჩის“ ერთ-ერთმა ლიდერმა, დეპუტატმა ვახტანგ მეგრელიშვილმა განაცხადა.
„ჩემი აზრით, საქართველოს მთავრობას არ აქვს არანაირი პრობლემა საერთაშორისო ურთიერთობების თვალსაზრისით, რომ ის ფორმატებში, სადაც ისინი მონაწილეობენ, სააკაშვილის თემაზე ილაპარაკონ საჯაროდ. რეალურად, გამოდის, რომ ქართულ ხელისუფლებას ძალიან მნიშვნელოვან ბრალდებას უყენებენ. საქართველოში არ არის იმის განცდა, რომ ახლა ვინმე მიხეილ სააკაშვილს წამლავს; არც ამის მტკიცებულებებია, რომელიც მე ამაში დამარწმუნებდა – მიუხედავად ამისა, ჩემთვის პატივსაცემი ძალიან ბევრი ადამიანი საერთაშორისო არენაზე ამ თემაზე საუბრობს, როგორც დადასტურებულ ფაქტზე. ეს ხომ, როგორც მინიმუმ, შეცდომაა – ასეთ ბრალდებას სჭირდება დამაჯერებელი პასუხი. ხელისუფლების შეთავაზება, რომ სააკაშვილს შეუძლია, მოიწვიოს ნებისმიერი საერთაშორისო სპეციალისტი, ეს არგუმენტი შეიძლება იყოს დამაჯერებელი ჩემთვის ან თქვენთვის, მაგრამ, როგორც ჩანს, ამ არგუმენტს არ გამოუღია ის შედეგი საერთაშორისო სარბიელზე იმ ადამიანების გონებაში, ვინც „მაგნიტსკის სიის“ შედგენაზე საუბრობს“, – აცხადებს მეგრელიშვილი.