რუსეთის მიერ წარმოებულ ამ ომში საქართველო უკრაინას შეიარაღებულ მხარდაჭერას არ აღმოუჩენს, ეს იქნებოდა პირდაპირი საფრთხე მეორე ფრონტის გახსნის, რაც დამღუპველი იქნება ჩვენი ქვეყნისთვის, – ამის შესახებ საპარლამენტო უმრავლესობის წევრმა რატი იონათამიშვილმა განაცხადა, რითაც გამოეხმაურა საქართველოში უკრაინის საქმეთა დროებითი რწმუნებულის, ანდრეი კასიანოვის სტატიას, სადაც წერია, რომ უკრაინამ საქართველოს 2008 წლის ომის დროს გადაცემული „ბუკის“ სისტემების დაბრუნება სთხოვა.
„საქართველო ახორციელებს ყველანაირ ჰუმანიტარულ დახმარებას, ვაგზავნით ტვირთს, გენერატორებს. ამ მხრივ ჩვენ ვართ ერთ-ერთი ლიდერი, მაგრამ მხარედ საქართველო ამ ომში არ დაფიქსირდება. რაც შეეხება მეორე ნაწილს, 2008 წელს „ბუკი“ საქართველომ შეიძინა უკრაინისგან, ამაში ფულია გადახდილი და, ცხადია, ჩვენ არავისგან არაფერი დასამადლებელი არ გვჭირს“, – განაცხადა იონათამიშვილმა.
უკრაინულ მედიაში, უკრაინის საქმეთა დროებითი რწმუნებულის სტატია გამოქვეყნდა, სადაც ის პირდაპირ ამბობს, რომ ამერიკის შეერთებული შტატები, საქართველოს უკრაინისთვის იარაღის გადაცემას სთხოვდა. სტატიაში ასევე საუბარია საქართველოს მიერ უკრაინისთვის „ჯაველინის“ სისტემების გადაცემის მოთხოვნაზე, რომლებიც ქვეყანას ამერიკისგან აქვს მიღებული. გარდა ამისა, სტატიაში ასევე ვკითხულობთ, რომ ოფიციალური კიევი თბილისისგან „ბუკის“ სარაკეტო კომპლექსების დაბრუნებას სთხოვს. იმ კომპლექსების, რომელიც საქართველომ ჯერ კიდევ აგვისტოს ომამდე უკრაინისგან იყიდა და ამის ამსახველი დოკუმენტაციაც არსებობს.