ყურადღების მიღმაა დარჩენილი ის უზარმაზარი ჰუმანიტარული დახმარება, რომელსაც საქართველო ყველა მიმართულებით უწევს უკრაინას, ის უზარმაზარი დიპლომატიური ძალისხმევა, რომელსაც საქართველო ყველა მიმართულებით ახორციელებს, – ამის შესახებ საპარლამენტო უმრავლესობის წევრმა, გია ცაგარეიშვილმა განაცხადა.
„კიევის პირველი შტურმი, ბუჩის უბედურება სწორედ ბელარუსიდან უკრაინაში შემოჭრილმა რუსმა სამხედროებმა ჩაიდინეს. უშუალოდ ბელარუსის ტერიტორიიდან იბომბებოდა ომის პირველ დღეებში დედაქალაქი. აქ სუბიექტივიზმის ნიშნები ჩანს, არა მხოლოდ ამ კონკრეტულ შემთხვევასთან დაკავშირებით, არამედ, მუდმივად – თუნდაც ბატონი კასიანოვის რეაქციები [ჩვენს მიმართ] ასევე სხვა უკრაინელი პოლიტიკოსების. ყურადღების მიღმაა დარჩენილი ის უზარმაზარი ჰუმანიტარული დახმარება, რომელსაც საქართველო ყველა მიმართულებით უწევს უკრაინას, ის უზარმაზარი დიპლომატიური ძალისხმევა, რომელიც საქართველო ყველა მიმართულებით ახორციელებს. მაგალითად, გუშინ გაეროს პირველივე სხდომაზე ფაქტობრივად ერთ-ერთი პირველი გამობრძანდა ჩვენი ელჩი და ისაუბრა მათ შორის უკრაინის მხარდაჭერაზე“, – აღნიშნა გია ცაგარეიშვილმა.
უკრაინის მოთხოვნით ევროკავშირმა ბელარუსი სანქციების ბოლო პაკეტში არ შეიყვანა. ეს ინფორმაცია, რომელიც „რადიო თავისუფლების“ ჟურნალისტმა გაავრცელა, მოგვიანებით თავად უკრაინის დიპლომატიურმა უწყებამ უარყო. ქვეყნის ოფიციალური პოზიცია ცნობილია, თუმცა ის, რაც მედიაში გავრცელდა, კითხვებს უჩენს ქართველ პოლიტიკოსებს.