ჩვენ შევქმენით პლატფორმა „დაიცავი მშვიდობა“, რათა გაირკვეს, რა მოხდა 2008 წლის ომის დაწყების წინ, რა გარიგება იყო სააკაშვილსა და რუსეთს შორის, რომელმაც გამოიწვია უმძიმესი შედეგები საქართველოსთვის და ხელისუფლების მესვეურთა გამდიდრება, მათ შორის იმ 2,5 მილიარდი დოლარის გაფლანგვა-მითვისება, რომელიც გამოყოფილი იყო ცხინვალის რეგიონიდან დევნილებისთვის, – ამის შესახებ „ქრონიკის“ ეთერში პლატფორმის „დაიცავი მშვიდობა“ ინიციატორმა, „სტრატეგიული დაგეგმარების ცენტრის“ ხელმძღვანელმა, ლევან მამალაძემ განაცხადა.
„ჩვენ დამაჯერებლად ვსაუბრობთ იქიდან გამომდინარე, რა ინფორმაციაც არსებობს. პირველი წყარო არის სააკაშვილის და მისი ხელისუფლების განცხადებები. ისინი აცხადებდნენ, რომ მათ ჰქონდათ მოლაპარაკებები რუსეთთან. რით უნდა აიხსნას ის, რომ დამარცხებულ ქვეყანაში, ოკუპირებული ტერიტორიებით, მათ ოფშორულ კომპანიებში და პირად ანგარიშებზე მოხდა თანხების უზარმაზარი შემოდინება. მათ ჩამოიყვანეს დიდი ნაკადი რუსი ბიზნესმენებისა, რომლებსაც გადასცეს სტრატეგიული ობიექტები. გამოდის, რომ საქართველო დამარცხდა, ქართველი ხალხი დამარცხდა, ისინი კი გამდიდრდნენ. ეს არის ყველაზე მძიმე შედეგი, რომელიც გამოძიებული უნდა იყოს. ჩვენთან უამრავი ადამიანი მოდის და კონკრეტულ ფაქტებს ასახელებს. ამიტომ გადავწყვიტეთ, შევქმნათ საზოგადოებრივი საგამოძიებო კომისია, სადაც ეს მასალები შეიკრიბება და ჩვენ დავეხმარებით პროკურატურას, რომ ეს გამოძიება სწრაფად წარიმართოს“, – აცხადებს ლევან მამალაძე.