“ზოგადად, ჩვენი ხელისუფლების პასუხისმგებლობაა, ყველა პატიმარს მიეწოდოს სამედიცინო სერვისი საჭიროების შემთხვევაში და უზრუნველყოს მისი უსაფრთხო გარემო, სადაც იხდის სასჯელს”, – ამის შესახებ მმართველი გუნდის წევრმა წევრმა, ირაკლი ზარქუამ განაცხადა.
ზარქუას შეფასებით, ის, რომ ევროპარლამენტში მიხეილ სააკაშვილის მდგომარეობის შესახებ დღეს დებატები გაიმართება – დაგეგმილი სპექტაკლია.
„ვისურვებდი, რომ ბატონმა სააკაშვილმა თავი დაანებოს საბოტაჟს და დაემორჩილოს ექიმების რეკომენდაციას. ჩვენი პასუხისმგებლობაა, მივაწოდოთ ის სერვისები, რაც მას სჭირდება. ევროპარლამენტში დებატებს რაც შეეხება, ეს არის კიდევ ერთხელ დაგეგმილი სპექტაკლი. დღეს დებატები ჩაინიშნა ევროპის სახალხო პარტიაში. ვინმეს თუ ჰგონია, რომ პატიმრის გამო ხდება ერთ დღეში, რამდენიმე საათში ევროპარლამენტში დებატების ჩანიშვნა? არა, ბატონებო. ეს არის დაგეგმილი, რომ საქართველო და ხელისუფლება გამოაჩინონ, თითქოს ჩვენ პატიმრების უფლებებს ვარღვევთ, ადამიანს ვაწამებთ, ვკლავთ. ვურჩევდი ევროპარლამენტარებს, „ევროპის სახალხო პარტიის“ წევრებს, თავი გაანებონ ჩვენს ქვეყანას. საქართველო გამოქვეყნებული რეიტინგებით წინ უსწრებს ევროკავშირის ცხრა სახელმწიფოს, მათ შორის, კორუფციასთან ბრძოლით, კანონის უზენაესობით, ბიზნესის კეთების მიმართულებით. მათი მცდელობაა, რომ რამენაირად სააკაშვილის თემა გამოიყენონ, რომ აქ დაძაბონ სიტუაცია და შემდეგ მეორე ფრონტი გაიხსნას“, – განაცხადა ზარქუამ.