ოპოზიციონერმა დეპუტატმა დავით ზილფიმიანმა პარლამენტის დღევანდელ სესიაზე ოპოზიციის მიერ დაანონსებულ ქუჩის აქციებზე ისაუბრა.
„მინდა ოპოზიციის ნაწილის მიერ, დაანონსებულ ქუჩის აქციებთან დაკავშირებით, გაგიზიაროთ ჩემი მოსაზრება, რომელიც შესაძლოა ზოგიერთმა ოპოზიციონერმა კოლეგამ იცოდეს კიდეც, მაგრამ ზოგადად ყურადსაღები იქნებოდა.
ერთი და იგივე აქცია, ერთ შემთხვევაში თუ ეს პროტესტის ნიშნად, რომელიმე სახელმწიფო დაწესებულებასთან ან ინსტიტუციასთან ტარდება, მათ შორის ხელმძღვანელი პირის მიმართებით, კანონით ამას მშვიდობიანი აქციის დეფინიცია ენიჭება და ამაში მიუღებელი არაფერია, ხოლო იგივე ქმედება, რაც ნებისმიერი ფიზიკური ან სახელმწიფო თანამდებობის პირის საცხოვრებელთან ან მის კერძო საკუთრებასთან გეოგრაფიაშია, მითუმეტეს თუ ეს, იქ, სხვა ოჯახის წევრების ბავშვების, ქალების შეშინებას – ტერორიზებას იწვევს, აბსოლიტურად სხვა დეფინიციის ქმედებაა.
ამიტომ პრემიერ-მინისტრის, მინისტრის თუ ნებისმიერი სხვა პირების საცხოვრებელთან „მივარდნაზე“ ხელის აღება კარგი გადაწყვეტილება იქნებოდა.
იმედი მაქვს, რომ ეს კოლეგიალურ გაფრთხილებად იქნება აღქმული, ხოლო გაზიარება სრულად მხარის პრეროგატივად დამიტოვებია“ – განაცხადა ზილფიმიანმა.