საქართველოს ოფიციალური ვიზიტით ხორვატიის საგარეო და ევროპულ საქმეთა მინისტრი, გორდან გრილიჩ რადმანი სტუმრობს. ვიზიტი საგარეო საქმეთა სამინისტროში სტუმრობით დაიწყო, სადაც რადმანი საგარეო უწყების ხელმძღვანელ ილია დარჩიაშვილს შეხვდა.
შეხვედრაზე სხვა საკითხებთან ერთად აღინიშნა საქართველოს როლი ევროპის ენერგომომარაგების კუთხით. დარჩიაშვილმა და მისმა კოლეგამ ორ დოკუმენტს მოაწერეს ხელი – ერთი საქართველოსა და ხორვატიას შორის ეკონომიკურ თანამშრომლობას ითვალისწინებს, მეორე კი ორ საგარეო უწყებას შორის გაფორმებული მემორანდუმია, რომელიც ტრენინგებს ეხება.
„ამ ვიზიტს ისტორიული მნიშვნელობა აქვს. ეს ხორვატიის საგარეო საქმეთა მინისტრის პირველი ვიზიტია. მსურს კიდევ ერთხელ გადავუხადო მადლობა მინისტრს, ხორვატიის ხელისუფლებას საქართველოს სუვერენიტეტისა და ტერიტორიული მთლიანობის მტკიცე მხარდაჭერისთვის, რუსეთ-საქართველოს კონფლიქტის მშვიდობიანი მოგვარების პროცესისა და ევროკავშირის სადამკვირვებლო მისიაში შეტანილი წვლილისთვის. ვისაუბრეთ თანამშრომლობის გაღრმავების პერსპექტივაზე სხვადასხვა ფორმატში“, – აღნიშნა დარჩიაშვილმა შეხვედრის შემდეგ გამართულ ორმხრივ ბრიფინგზე.
ვიზიტის ფარგლებში, ხორვატიის პირველი დიპლომატი საქართველოს აღმასრულებელი და საკანონმდებლო ხელისუფლების უმაღლეს პირებს შეხვდება.