„ქვეყანაში მხოლოდ იმპორტირებული ფქვილია, ადგილობრივი ფქვილი მინიმუმამდეა დასული“, – ამის შესახებ „საქართველოს ხორბლისა და ფქვილის მწარმოებელთა ასოციაციის“ აღმასრულებელმა დირექტორმა, ლევან სილაგავამ მედიაჰოლდინგ „კვირას“ პრესკლუბში გამართულ პრესკონფერენციაზე განაცხადა.
მისი თქმით, ხორბალი იმ მიზეზით არ შემოდის, რომ დღეს რუსეთის საექსპორტო გადასახადი უფრო მაღალია, რაც ავტომატურად იმას ნიშნავს, რომ ხორბლის შემოტანას სიძვირის გამო აზრი არ აქვს.
„ბაზარზე ყველაზე კარგი სიტუაცია მაშინაა, როდესაც ადგილობრივი წარმოებაც მუშაობს და ფქვილის იმპორტიც. თუ დღევანდელ სიტუაციას შევხედავთ, სამწუხაროდ, ადგილობრივი წისქვილკომბინატები გაჩერებულია, იქიდან გამომდინარე, რომ რუსეთის ბაჟი ისევ გაზრდილია. როდესაც რუსეთის საექსპორტო ბაჟი იზრდება, ეს ავტომატურად იმას ნიშნავს, რომ საქართველოში ფქვილის შემომტანები რუსეთის წისქვილკომბინატები ხდებიან. ეს კი ადგილობრივი წისქვილკომბინატების გაჩერებას ნიშნავს. სამწუხაროდ, დღეს მეორე ტალღაში შევდივართ, პირველი ტალღა შარშან იყო, მოგეხსენებათ, წისქვილკომბინატების უმეტესობა გაჩერდა. ამასთან დაკავშირებით დღესაც პრობლემა გვაქვს. ანუ, ქვეყანაში არის მხოლოდ იმპორტირებული ფქვილი, ადგილობრივი ფქვილი მინიმუმამდეა დასული. აქედან გამომდინარე, საჭიროა, სიტუაციას უფრო ფართო პრიზმით შევხედოთ.
ხორბალი იმ მიზეზით არ შემოდის, რომ დღეს რუსეთის საბაჟო – საექსპორტო გადასახადი უფრო მაღალია, რაც ავტომატურად ნიშნავს იმას, რომ ხორბლის შემოტანას აზრი არ აქვს და ქვეყანა ფქვილზე გადავიდა. ფქვილზე გადასული ნიშნავს იმას, რომ ქვეყანას პურის ქარხნებისთვის მისაწოდებელი ფქვილი ექნება, მაგრამ წისქვილები გაჩერდება, რადგან ბიზნესური პროცესებიდან გამომდინარე, ხორბლის შემოტანა და გადამუშავება არ უღირთ. იმიტომ, რომ ეს უფრო ძვირი ხორბალი იქნება“, – განაცხადა სილაგავამ.
მისივე თქმით, დღეს ის სიტუაცია და ველია შექმნილი, როდესაც შეიძლება, სიტუაცია ისე გადაწყდეს, რომ ადგილობრივმა წარმოებამ, წისქვილებმაც იმუშაონ და ფქვილის იმპორტიც განხორციელდეს.
„გვინდა, რომ პურის მწარმოებლებს, ჩვენს და მთავრობას შორის გარკვეული სოლიდარობა დავინახოთ იქიდან გამომდინარე, რომ ბალანსი აღდგეს. დღეს მთლიანობაში ფქვილის ფასი დაწეულია, 70 ლარიდან საშუალოდ 60 ლარზეა ჩამოსული. 1 ტომარა ფქვილზე ფასი დაახლოებით 10 ლარით ჩამოვიდა, ფაქტობრივად, შესაძლებლობა შეიძლება, გამოინახოს, რომ გარკვეულწილად გადასახადის საკანონმდებლო ინიციატივების საშუალებით მოხდეს ის, რომ წისქვილკომბინატებმაც იმუშაონ, იმპორტიც მოხდეს, მათ შორის, ადგილზე პურის ფასიც შენარჩუნდეს. მთავრობასთან ერთად ეს ამოცანა გვაქვს.
დღევანდელი სიტუაციიდან გამომდინარე, ფერმერთა პრობლემაც შემოვიდა. ფერმერებს თვითღირებულება მეტი უჯდებათ იქიდან გამომდინარე, რომ გაძვირებულია ყველა კომპონენტი, ხორბლის დათესვიდან დაწყებული, მოყვანით დამთავრებული. შესაბამისად, მათაც უნდა ჰქონდეთ ხორბლის მოყვანის და წისქვილკომბინატებში ჩაბარების საშუალება. ამ ყველა დარგმა ერთიანად და მთლიანობაში უნდა იმუშაოს. ამ პრიზმით ვცდილობთ, ეს სიტუაცია დავინახოთ ჩვენც, მთავრობამაც, მეპურეებმაც, ფერმერებმაც, მივიდეთ იმ ამოცანის შესრულებამდე, რომელიც მთავრობამ შარშანაც დასახა. ესაა სასურსათო უზრუნველყოფის თემა. დღეს მარაგები არის, მაგრამ არის ფქვილად. ხორბლად უფრო ძვირი მარაგებია შექმნილი და მისი შევსება ვერ ხდება.
მთავრობას ბოლო წლების განმავლობაში სტრატეგია აქვს დასახული, რაც გულისხმობს იმას, რომ ადგილობრივი ხორბლის მოსავლის თვითუზრუნველყოფა დღევანდელი 10 %-დან დაახლოებით 40-50 %-მდე იყოს გაზრდილი, ამ ჯაჭვში ადგილობრივი ხორბლის მოსავლის ინტერესი, პურის სტაბილური ფასის ინტერესი, წისქვილკომბინატების სტაბილური მუშაობის ინტერესი, იმპორტის სტაბილური შემოსვლის ინტერესი სწორად უნდა ჩაჯდეს . ამის გადაწყვეტის მექანიზმად შეიძლება, ისევ და ისევ მთავრობასთან მოლაპარაკება ჩაითვალოს, რომელშიც ჩვენც შესულები ვართ და პურის მწარმოებლებიც.
უახლოეს მომავალში ამასთან დაკავშირებით მთავრობასთან შეხვედრები კიდევ გვექნება. დღეს ვფიქრობ, ის სიტუაცია და ველია შექმნილი, როდესაც შეიძლება, გადაწყდეს სიტუაცია ისე, რომ ადგილობრივმა წარმოებამ, წისქვილმაც იმუშაოს და ფქვილის იმპორტიც განხორციელდეს, წისვიქლკომბინატებს და ფქვილის იმპორტს შორის კონკურენცია იყოს, რაც ბაზარზე ფქვილის და პურის ფასს სერიოზულად წაადგება ხოლმე“, – განაცხადა სილაგავამ.