„ნაციონალურმა მოძრაობამ“ შესაძლოა საპარლამენტო ბოიკოტი შეწყვიტოს. ამას ადასტურებს ფრაქციის ყოფილი თავმჯდომარის გადაწყვეტილება. ხატია დეკანოიძე მზად არის „ხალხის ძალის“ მიერ მომზადებული კანონპროექტის საკომიტეტო განხილვას დაესწროს. „ბოიკოტიც და საპარლამენტო მანდატების დატოვებაც არ არის შედეგის მომტანი. ვაპირებ კანონპროექტზე საკომიტეტო განხილვებს დავესწრო“, – აცხადებს დეკანოიძე.
იგივე პოზიცია აქვს „ნაციონალური მოძრაობის“ წევრ ლევან ბეჟაშვილსაც. მისი თქმით, საერთაშორისო ინსტიტუტებისთვისაც მნიშვნელოვანია, რომ პარლამენტში ჰყავდეს ძლიერი ოპოზიციური წარმომადგენლობა, ამიტომ მათი მოთხოვნის გათვალისწინებითაც, იმიტომაც, რომ საქმე ანტიევროპულ კანონს ეხება, ჩართვებიან საპარლამენტო საქმიანობაში და გააგრძელებენ მასში მონაწილეობას.
თუმცა, პარტიის ახლად არჩეულმა თავმჯდომარემ, ლევან ხაბეიშვილმა განაცხადა, რომ იქამდე, სანამ ექსპრეზიდენტი სააკაშვილი ციხეშია, პარტიის გადაწყვეტილება საპარლამენტო ბოიკოტთან დაკავშირებით არ გადაიხედება.
მმართველი გუნდი ამბობს, რომ „ნაციონალური მოძრაობა“ მილევადი პარტიაა და ამას საზოგადოება უკვე მკაფიოდ ხედავს. „ახლა შემოვლენ, რომ შემოვლენ და იქიდანაც ვერაფერს მიიღებენ, მერე ისევ გავლენ. მერე ვერ მიიღებენ ვერაფერს და ისევ შემოვლენ და ა.შ.“ – აცხადებს „ქართული ოცნების“ თავმჯდომარე ირაკლი კობახიძე.
საპარლამენტო უმრავლესობის დეპუტატი დავით მათიკაშვილი თვლის, რომ „ნაციონალური მოძრაობა“ საპარლამენტო საქმიანობაში ვერაფერს ცვლის. „მათი შემოსვლით და გასვლით არც არაფერი იცვლება, არც არაფერი წყდება, ერთადერთი კიდევ კარგად დაინახავს საზოგადოება, თუ რას წარმოადგენს დეგრადირებული „ნაციონალური მოძრაობა“, – აცხადებს მათიკაშვილი.
„ჩემი აზრით, ისინი უკან უნდა დაბრუნდნენ როგორც არა „ნაციონალური მოძრაობის“ წევრები, არამედ როგორც თავისუფალი დეპუტატები, რადან პარტიის წევრად დაბრუნებას არანაირი აზრი არ აქვს და არც ვურჩევდი“, – აცხადებს „გირჩის“ ლიდერი იაგო ხვიჩია.
„არანაირი მნიშვნელობა არ აქვს „ნაციონალური მოძრაობა“ რა იზამს. ეს არის მორიგი არათანმიმდევრულობის და არასერიოზულობის გამოვლინება. მერამდენე რაუნდზე ვართ უკვე ვუყრუებთ „ნაციონალური მოძრაობის“ შესვლა-გასვლის შოუს“, – აცხადებს პარტია „საქართველოსთვის“ პოლიტიკური საბჭოს წევრი, ანა ბუჩუკური.