საპარლამენტო უმრავლესობის წევრი გივი მიქანაძე გამოეხმაურა „ქრონიკის“ მიერ ექსკლუზიურად მოპოვებულ ინფორმაციას, რომლის მიხედვითაც, დავით კეზერაშვილი და სააკაშვილის ხელისუფლების ყოფილი მაღალჩინოსნები ბრიტანელ ლობისტებთან შეხვედრებს მართავენ.
„მის მიერ გაღებული ნებისმიერი თანხა და ის 100 000, რაზეც არის საუბარი, ეს არის ისეთივე 100 000, როგორიც იყო 15-20 ათასი დოლარი, რაც გადაუხადეს ამერიკულ ლობისტურ კომპანიას და შემდეგ აღმოჩნდა, რომ იყო არა 15-20 ათასი, არამედ ერთ მილიონამდე. ეს თანხა გადახდილი იქნება ტყუილად, იქიდან გამომდინარე, რომ სააკაშვილის ჯანმრთელობა და სიცოცხლე იქნება დაცული, როგორც ეს აქამდე ხდებოდა“, – აცხადებს მიქანაძე.
„ქრონიკის“ ინფორმაციით, კეზერაშვილი საქართველოს წინააღმდეგ ახალ გარიგებებს იწყებს. „ქრონიკას“ ექსკლუზიურად მიაწოდეს ფოტო ლონდონიდან, სადაც ჩანან ყოფილი სახელმწიფო მინისტრი თემურ იაკობაშვილი, ყოფილი ელჩი დიდ ბრიტანეთში გიორგი ბადრიძე, ყოფილი მინისტრი დავით კეზერაშვილი და სააკაშვილის ადმინისტრაციის ყოფილი უფროსი დავით ტყეშელაშვილი.
როგორც „ქრონიკის“ წყარო ამბობს, ამ შეხვედრაზე დავით კეზერაშვილსა და დავით ტყეშელაშვილს ყოფილმა სახელმწიფო მინისტრმა და ყოფილმა ელჩმა მიაწოდეს ინფორმაცია იმ მოლაპარაკებების შესახებ, რომელსაც ისინი ბრიტანელ ლობისტებთან მართავენ.