მინდა ღრმა მწუხარება გამოვხატო კიდევ ერთხელ და სამძიმარი ვუთხრა გარდაცვლილი ადამიანების ოჯახებს, ვუთხრა თურქეთის მთავრობას, – ამის შესახებ შს მინისტრმა ვახტანგ გომელაურმა ჟურნალისტებთან განაცხადა, რომელიც პრემიერ-მინისტრთან ერთად თურქეთში იმყოფება.
„იცით, რომ იმ დღიდანვე მოხდა ბიჭების მობილიზება, აღჭურვილობის მობილიზება, დილიდანვე დაიძრნენ და თუ არ მეშლება მეთვრამეტე დღეა აქ არიან. სამი ადამიანი გადაარჩინეს, ცოცხლები ამოიყვანეს და სამწუხაროდ, თუ არ ვცდები, 85 დაღუპული ამოასვენეს ნანგრევებიდან. ჩვენი მაშველები მომზადებულები არიან მაღალ დონეზე, არიან გამოცდილები. მინდა მადლობა ვუთხრა თითოეულ მათგანს; როდესაც გვეუბნებიან მადლობას იმიტომ, რომ თქვენა ბიჭებმა ძალიან მაგრად იმუშავესო, მე ამაყი ვარ. ყველა კითხულობდა – სად არიან ქართველები, გვიშველეთო. ეს ჩემთვის საამაყოა ნამდვილად და ამისთვის დიდი მადლობა თითოეულ მათგანს“, – განაცხადა გომელაურმა.