“რადიკალური ოპოზიცია, მისი ცალკეული წარმომადგენლები იმდენად შეპყრობილი არიან „ქართული ოცნების“, პოლიტიკური ოპონენტის, ზოგადად საზოგადოების, ქვეყნის დაზიანების იდეითა და სტრატეგიული გეგმით, რომ არ უფიქრდებიან, რა კანონს აკრიტიკებენ”, – ამის შესახებ მმართველი გუნდის წევრმა, გიორგი ვოლსკიმ “ხალხის ძალის” კანონპროექტთან დაკავშირებით გაკეთებული კრიტიკული განცხადებების თაობაზე აღნიშნა.
მისივე თქმით, ოპოზიცია მიუღებელ მეთოდებს მიმართავს.
„ეს იდეით შეპყრობა იმდენად ძლიერი და გადაულახავია მათ პათოსში, რომ ვეღარ არჩევენ, რეალურად რასთან აქვთ საქმე. შესაძლოა, იციან კიდეც, რომ ეს კანონპროექტი ამერიკულ კანონთან შესაბამისობაშია, მაგრამ იმ მიზნით, რომ სიცრუე მიაწოდონ საზოგადოებას, რომელიც შეიძლება, უცბად ვერ გაერკვეს სიტუაციაში, მაინც მიმართავენ მიუღებელ მეთოდებს. ხატია დეკანოიძე ერთადერთი არ არის, ვინც ამ დაზიანების იდეითაა შეპყრობილი“, – აღნიშნა ვოლსკიმ.