ფრაქცია „ქართული ოცნების“ თავმჯდომარე მამუკა მდინარაძე პოლონურ მედიაში მიხეილ სააკაშვილთან დაკავშირებით გავრცელებულ ინფორმაციას დემარშთან დაკავშირებით და იუსტიციის მინისტრ რატი ბრეგაძის გამოხმაურებას აფასებს.
„ალბათ სულ რამდენიმე მედიასაშუალება თუ შეძლებს მსოფლიოში ისეთი რამის კეთებას, როდესაც შეხვედრას ჰყავს ორი მხარე – ერთი ელჩები, რომლებმაც განახორციელეს დემარში და დაინტერესდნენ სააკაშვილის ჯანმრთელობის მდგომარეობით, გამოთქვეს შეშფოთება და მეორე მხარე – ამ დემარშის მიმღები – საქართველოს იუსტიციის სამინისტრო და მინისტრი. ერთიც და მეორეც საუბრობს ერთსადაიმავე რამეს და ტელევიზიები და მედიასაშუალებები ამბობენ სხვა რამეს. მინისტრიც ადასტურებს იმას, რაც თქვა ელჩმა, ოღონდ ტელევიზიები სულ სხვა რამეს ამბობენ. იუსტიციის მინისტრი და ევროკავშირის ელჩი საუბრობენ ერთიდაიგივე რაღაცას, რომ განხორციელდა დემარში და დემარშის შინაარსი გახლდათ სააკაშვილის ჯანმრთელობის მდგომარეობით შეშფოთება და პასუხად მათ მიიღეს დეტალური განმარტება. არც გადაყვანაზე და არც მსგავს საკითხებზე ამ დემარშის განხორციელების დროს საუბარი არ ყოფილა. ახლა საუბრობს პოლონური მედიის რაღაც ნაწილი, ქართული მედიის ის ცრუ ნაწილი, რომელსაც „ნაცმოძრაობის“ ტელევიზიები ჰქვია და ჩვენ თუ მივეჩვიეთ იმას, რომ შეხვედრისას ერთი მხარე და მეორე მხარე რას ლაპარაკობენ ის არ დავიჯერეთ, არამედ მესამე რასაც იტყუება, ის დავიჯეროთ, გამოდის, რომ საზოგადოებას ვატყუებთ, რასაც არ ვაპირებ თქვენსავით“, – აცხადებს მდინარაძე.