“ალბათ გამოვარდება ვაშაძე და იტყვის, რომ რუსეთმა საქართველოს მთავრობა დაასაჩუქრა, ვაშაძე ხომ იცით რომელია – საკუთარი ბინა რომ რუსებს მიაქირავა”

სააკაშვილი ომის შემდეგ პირველი იყო, ვინც რუსეთის მოქალაქეებს საქართველოში უვიზო მიმოსვლა დაუწესა, ბუნებრივია ამას არ მოჰყოლია მეორე მხრიდან რეაგირება, იმიტომ რომ რუსეთის მხარე დღემდე სჯიდა ჩვენს მოქალაქეებს, – ამის შესახებ საპარლამენტო უმრავლესობის წევრმა, ირაკლი ზარქუამ რუსეთის მიერ საქართველოს მოქალაქეებისთვის სავიზო რეჟიმის მოხსნაზე საუბრისას განაცხადა.

მისი თქმით, საქართველოს მოქალაქეებს უწევდათ სხვადასხვა ქვეყნის გავლით დაბრუნება, იმ ფონზე, რომ რუსეთის მოქალაქეები შეფერხების გარეშე კვეთდნენ საქართველოს საზღვარს.

როგორც მან აღნიშნა, რუსეთის მხრიდან შემდეგი ნაბიჯი ოკუპირებული ტერიტორიების დაბრუნება უნდა იყოს.

„რა გადაწყვეტილებაც იყო მიღებული, კიდევ ერთხელ ვამბობ, რუსეთის მხარემ დააწესა უვიზო მიმოსვლის შეზღუდვა და თვითონვე მოხსნა, რაც ჩვენი მოქალაქეებისთვის ძალიან კარგია. რაც შეეხება ადგილობრივ ხელმოცარულებს პოლიტიკაში, ახლა, ალბათ გამოვარდება ვაშაძე, თუ უკვე არ იყო და იტყვის, რომ რუსეთმა დაასაჩუქრა საქართველოს მთავრობა. ვაშაძე ხომ იცით რომელია? – საკუთარი ბინა რომ რუსებს მიაქირავა და დღემდე ფულს იღებს. მერე გამოვარდება ალბათ ხოშტარია, იცით ხომ, რუსეთიდან რომ ფინანსდება ამდენი წელია და შემდეგ ბათუმში რომ ბინა შეიძინა. გამოვარდება ალბათ კიდევ გიჟი „ჯაფარა“, რომელიც ხომ იცით, რომელი „ჯაფარაა“? რომელსაც ვითომ ევროინტეგრაცია უნდა. ევროკომისიამ გვითხრა, ნაკლები პოლარიზაციაო და ის უკვე ახალგაზრდებს ამზადებს იარაღის გამოყენებაში და იმაში, თუ როგორ ჩაერთონ რევოლუციაში – აი ეს „ტროიკა“ და კიდევ დაემატებიან სხვა ხელმოცარულები.

კიდევ ერთხელ ვამბობთ, ჩვენთვის მნიშვნელოვანია, რომ საქართველოს მოქალაქეებისთვის კომფორტული იყოს რუსეთიდან საქართველოში დაბრუნება. რუსეთის მოქალაქეები ისედაც უპრობლემოდ გადმოდიან ლარსის გავლით მანქანით, საერთოდ არ აქვთ შეზღუდვა და იცით, თქვენ ამის შესახებ. ამიტომ, შემდეგი კარგი ნაბიჯი იქნება რუსეთის მხრიდან, აფხაზეთი დააბრუნოს, მესამე მნიშვნელოვანი ნაბიჯი – ოსეთი დააბრუნოს, ეს არის სწორი მიდგომა“, – აღნიშნა ირაკლი ზარქუამ.

ცნობისთვის, რუსეთმა საქართველოს მოქალაქეებისთვის სავიზო რეჟიმი გააუქმა. შესაბამისი განკარგულება რუსეთის პრეზიდენტმა, ვლადიმერ პუტინმა გამოსცა. პუტინის განკარგულების თანახმად, სავიზო რეჟიმი 15 მაისიდან გაუქმდება.