მიხეილ სააკაშვილი პატიმარია და ჩვენ როგორც ადრე, ასევე ახლაც, ვმოქმედებთ და მომავალშიც გავაგრძელებთ ექიმების რეკომენდაციების შესრულებას და როდესაც გვექნება შესაბამისი დასკვნა, ის გადაყვანილი იქნება შესაბამის პენიტენციურ დაწესებულებაში, – ამის შესახებ იუსტიციის მინისტრმა, რატი ბრეგაძემ ბრიფინგზე განაცხადა.
„თუკი იქნება ექიმების რეკომენდაცია, რომ შესაძლებელია მისი გადაყვანა პენიტენციურ დაწესებულებაში, ის გადაყვანილი იქნება. ამჟამად ის იმყოფება კლინიკა „ვივამედში“ და რაიმე სახის ობიექტური წინაპირობა იმისთვის, რომ სხვა კლინიკაში იყოს გადაყვანილი ან პენიტენციურ დაწესებულებაში, ამ ეტაპზე არ არსებობს“, – განაცხადა მინისტრმა.
როგორც რატი ბრეგაძემ განაცხადა, სტრასბურგის სასამართლომ უარი უთხრა მიხეილ სააკაშვილს ვარშავაში გადაყვანაზე და სახელმწიფოს არ დაავალა ქვეყნის შიგნით მისი სხვა სამკურნალო დაწესებულებაში გადაყვანა.