რუსეთში ცხოვრობს ჩვენი ძალიან ბევრი მოქალაქე და თუ ამ ადამიანებს ექნებათ შესაძლებლობა, რომ დაზოგონ დრო, ფინანსები იმისთვის, რომ საქართველოში ჩამოვიდნენ და წავიდნენ, ამაში, ცუდს ნამდვილად ვერაფერს ვხედავთ, – ამის შესახებ იუსტიციის მინისტრმა რატი ბრეგაძემ დღეს ბრიფინგზე განაცხადა.
„ფრენები აღადგინა რუსულმა მხარემ. საქართველოს კონსტიტუციითაც კი, რომელშიც 2017 წელს მიღებულ იყო გარკვეული ცვლილებები და დღეს გვაქვს ყველა დროის საუკეთესო კონსტიტუცია, პირველად ისტორიაში გაჩნდა ტერმინი დიასპორა, სადაც საუბარია, რომ სახელმწიფომ ხელი უნდა შეუწყოს ქართული დიასპორის სამშობლოსთან მჭიდრო კავშირის შენარჩუნებას. რუსეთში ცხოვრობს ჩვენი ძალიან ბევრი მოქალაქე და თუ ამ ადამიანებს ექნებათ შესაძლებლობა, რომ დაზოგონ დრო, ფინანსები იმისთვის, რომ საქართველოში ჩამოვიდნენ და წავიდნენ ამაში, ცუდს ნამდვილად ვერაფერს ვხედავთ. რაც შეეხება საქართველოს მიერ თავისი ინტერესების დაცვას. სამწუხაროდ, ბევრ ტელეარხზე სათანადოდ არ გაშუქდა და არ იყო წარმოჩენილი, მაგრამ თუნდაც რამდენიმე დღის წინ სწორედ საქართველოს მთავრობის და კერძოდ, იუსტიციის სამინისტროს განსაკუთრებით კარგი მუშაობით, საქართველოს ინტერესების დაცვით საერთაშორისო სასამართლოებში რუსეთის ფედერაციას დაეკისრა 130 მილიონი ევროს კომპენსაციის გადახდა. ჩვენ ყველგან და ყოველთვის ვიცავთ სამართლებრივი გზებით ჩვენს ინტერესებს. ჩვენ არცერთი ნაბიჯი, არცერთ სახელმწიფოსთან არ დაგვითმია და თუკი ჩაიდინა უკანონობა ვინმემ, ვალდებულია გადაიხადოს კომპენსაცია, მაგრამ ჩვენ ვითვალისწინებთ იმ გარემოებასაც, რომ მათ შორის ამ სახელმწიფოშიც ცხოვრობენ ჩვენი მოქალაქეები, რომლებსაც თუკი გაუმარტივდებათ ცხოვრება, ამას მხოლოდ და მხოლოდ მივესალმებით“,– განაცხადა ბრეგაძემ.