„ფრენებთან დაკავშირებით პასუხს გავცემ პატიმარ სააკაშვილის სიტყვებით – თავის დროზე საზღვარზე უთხრა რუსეთის მოქალაქეებს, „აუცილებელია, ჩამოხვიდეთ, დატკბეთ ჩვენი ბუნებით, მინერალური წყლებით, ჩვენი სტუმართმოყვარეობითო“, – ამის შესახებ უმრავლესობის დეპუტატმა, „ხალხის ძალის“ წევრმა, გურამ მაჭარაშვილმა საქართველოსა და რუსეთს შორის ფრენებთან დაკავშირებით განაცხადა.
„სამწუხაროდ, შეცვლილია აშშ-ის ელჩის ლოგიკაც, რომელიც ამბობს, რომ უკრაინაში ომი მიდის და ამიტომ არ უნდა მიეღო რუსეთს ეს გადაწყვეტილება. ჩვენთვის ომი 2008 წელს არ იყო, ოკუპაცია არ იყო და მშვიდობიანი მოსახლეობა არ დაიღუპა? თუ ჩვენთვის ეს ომი არ იყო და ახლა არის უკრაინისთვის ომი? ორმაგი სტანდარტები მიუღებელია ქართული საზოგადოებისთვის, ეს იქნება ელჩის თუ ნებისმიერი პოლიტიკოსის”, – განაცხადა მაჭარაშვილმა.
მაჭარაშვილი ასევე გამოეხმაურა „დროას“ ლიდერის ელენე ხოშტარიას განცხადებას, რომ „აზიმუტი“ სანქცირებულია.
„საერთაშორისო ინსტიტუტები, სახელმწიფო დეპარტამენტი აღიარებს, რომ საქართველოს ფინანსური ინსტიტუტები მკაცრად იცავს საერთაშორისო სანქციებს. ამ დროს გამოდის ხოშტარია და ამბობს, რომ საქართველო შავი ხვრელია, მეორე დღეს გამოდის მერე საფინანსო ინსტიტუტი და ამას უარყოფს, თავის ილუზიებშია ეს ადამიანი, გზა კვალი კარგად იცის რუსეთში, ენა და წესები, ამიტომ ჩავიდეს და იქ გაარკვიოს რა არის დასანქცირებული და რა არა“, – განაცხადა მაჭარაშვილმა.