მერწმუნეთ, ევროინტეგრაციის გზა შეიძლება გადიოდეს მხოლოდ სამართლის უზენაესობაზე და არა კანონიერად დაპატიმრებული ადამიანების გათავისუფლებაზე, – ამის შესახებ პარტია „ქართული ოცნების“ თავმჯდომარემ, ირაკლი კობახიძემ ჟურნალისტებს განუცხადა.
„ეს არის ევროინტეგრაციის ერთ-ერთი საკვანძო პრინციპი – სამართლის უზენაესობა, კანონის აღსრულება. თუ ეს საქართველოში არ გვექნება, ასეთ შემთხვევაში ევროპული პერსპექტივა არასდროს გვექნება. თუ ვინმე ამტკიცებს, რომ ევროინტეგრაცია სამართლის უზენაესობაზე უარის თქმას ნიშნავს, ეს მათი არჩევანია“, – აღნიშნა ირაკლი კობახიძემ.
„ნიკა გვარამიას თავისუფლების მოძრაობის“ წევრები და მათი თანამოაზრეები ტელეკომპანია „მთავარი არხის“ დამფუძნებლის, ნიკა გვარამიას გათავისუფლების მოთხოვნით, 27 მაისს, 18:00 საათზე, პრეზიდენტის სასახლესთან საპროტესტო აქციას აანონსებენ. როგორც მათ დღევანდელ ბრიფინგზე განაცხადეს, პროტესტი გაგრძელდება მანამ, ვიდრე ნიკა გვარამია არ გათავისუფლდება.