“ჩადენილი ქმედებებისთვის ყველამ პასუხი უნდა აგოს”

ყველამ პასუხი უნდა აგოს იმ ქმედებებისთვის, რაც ჩაიდინა,– ამის შესახებ მოძრაობა „ხალხის ძალის“ წევრმა გურამ მაჭარაშვილმა განაცხადა.

მისივე თქმით, საერთაშორისო სასამართლომ პატიმარ სააკაშვილთან და თავის დროზე გვარამიასთან დაკავშირებით გამამტყუნებელი განაჩენი გამოიტანა.

„ყველამ პასუხი უნდა აგოს იმ ქმედებებისთვის, რაც ჩაიდინა და თუ რამე, არსებობს გასაჩივრების საშუალებები. თქვენ იცით, რომ საერთაშორისო სასამართლო არსებობს და იმ საერთაშორისო სასამართლომ თქვა ზუსტად, მათ შორის პატიმარ სააკაშვილთან დაკავშირებითაც და თავის დროზე, „რუსთავი 2“-ზეც, რომ გამტყუნდა როგორც სააკაშვილი, ასევე გვარამია. ამიტომ გადახედონ ხოლმე ისტორიას და ნუ შეირცხვენენ თავს, როცა ასეთი პიროვნებების ადვოკატებად გამოდიან“, – აღნიშნა მაჭარაშვილმა.

დღეს ერთი წელი შესრულდა მას შემდეგ, რაც სასამართლოს გადაწყვეტილებით ნიკა გვარამიას პატიმრობა შეეფარდა. მხარდამჭერები და მეგობარი პოლიტიკოსები მის გათავისუფლებას ითხოვენ. ამბობენ, რომ საქართველოს ევროპული გზა ნიკა გვარამიას პატიმრობიდან გათავისუფლებაზე გადის.