ჩვენი ქვეყნის პრემიერ-მინისტრი, მთავრობა თუ როგორ პოლიტიკას ატარებს, ეს პირდაპირ ჩანს და ჩვენი საზოგადოება ამას ხედავს ყველა მიმართულებით; მშვიდობა არის დაცული, ორნიშნა ეკონომიკური ზრდა გვაქვს და საქართველო არის ყველაზე სტაბილური დემოკრატია დღეს რეგიონში. ეს არის ზუსტად ჩვენი ხელისუფლების პოლიტიკის შედეგი, – ამის შესახებ „ქრონიკის“ ეთერში პარლამენტის ვიცე-სპიკერმა, არჩილ თალაკვაძემ განაცხადა.
„რაც შეეხება რეიკიავიკის სამიტს, ჩვენი პრემიერი მონაწილეობდა ამ სამიტში და მისი გამოსვლა შეიცავდა ქვეყნის ინტერესებზე დაფუძნებულ და ასევე, პარტნიორების მიმართ ძალიან პასუხისმგებლობიან გზავნილებს. მან პირდაპირ თქვა, რომ საქართველო არის ერთგული თავისი ევროპული არჩევანის და მან ასევე თქვა, რომ ყველა სამართლიანი წესებით საქართველო იმსახურებს კანდიდატის სტატუსს და ნებისმიერი გადავადება ზრდის რისკებს და საფრთხეებს. ჩვენ ამაზე უკვე თვეების განმავლობაში ვსაუბრობთ და ამ რისკებს საზოგადოებაც და ჩვენი პარტნიორებიც ხედავენ ამ რისკებს, შესაბამისად, მისი გზავნილი იყო ძალიან ძლიერი და სახელმწიფოებრივი ინტერესებით ნაკარნახევი, როდესაც მან პირდაპირ უთხრა ევროპელ პოლიტიკოსებს, რომ საჭიროა ამ გადაწყვეტილების დროულად მიღება. მას რა თქმა უნდა ჩვენი გუნდის სრული პოლიტიკური მხარდაჭერა აქვს. ამასთან, ეს კიდევ ერთი სამიტია, სადაც პრემიერმა უკრაინის მხარდაჭერა დააფიქსირა“, – აცხადებს თალაკვაძე.