კიდევ ერთი ლუსტრაცია მოხდა გუშინდელი სესიის შემდეგ, რომ რადიკალურ ოპოზიციას არაფრად აინტერესებს ქვეყნის ევროინტეგრაცია, – ამის შესახებ ირაკლი ზარქუამ განაცხადა.
საპარლამენტო უმრავლესობის წევრის თქმით, „ქართული ოცნება“ მათ იუსტიციის უმაღლესი საბჭოს არამოსამართლე წევრების ვაკანტურ ადგილებზე კანდიდატურების წარდგენას ერთი თვის განმავლობაში სთხოვდა, რადგან ეს 12 ევრორეკომენდაციის ერთ-ერთი პუნქტია, რომლის შესრულებაც კანდიდატის სტატუსის მისაღებად მნიშვნელოვანია.
დეპუტატმა ასევე გუშინდელი კენჭისყრის შემდეგ ფრაქცია „ნაციონალურ მოძრაობაში“ განვითარებულ მოვლენებზე ისაუბრა.
„გვერდიგვერდ სხედან რამდენი ხანია და განსხვავებული აზრის გამო ჯვარს აცვეს [ოპოზიციონერი დეპუტატები, რომლებმაც კენჭისყრაში მიიღეს მონაწილეობა]. დღეს ვეძებ. მაჭუტა როგორ არის, პირველი ეგ ვიკითხე“, – განაცხადა ზარქუამ.
იუსტიციის უმაღლესმა საბჭომ სამი არამოსამართლე წევრი აირჩია. ტრისტან ბენაშვილმა, გიორგი გზობავამ და ზურაბ გურასპაშვილმა 90-ზე მეტი ხმა მიიღეს. პარლამენტის პლენარულ სხდომაზე გამართული კენჭისყრის შედეგად, იუსტიციის უმაღლეს საბჭოში არსებული 5 არამოსამართლე წევრის ვაკანსიიდან მხოლოდ სამი ვაკანსია შეივსო. კენჭისყრაში ხუთმა ოპოზიციონერმა მიიღო მონაწილეობა. აქედან 4 – ნიკა მაჭუტაძე, ნატო და როსტომ ჩხეიძეები და ბაჩუკი ქარდავა, ფრაქცია „ნაციონალური მოძრაობის“ წევრია. მათა ფრაქცია დატოვეს.