მეტი ლუსტრაცია რა უნდა იყოს, როდესაც ევრორეკომენდაციების შესრულებისა და მხარდაჭერისთვის თავის თანაგუნდელებს მოღალატეებს ეძახიან. ვფიქრობ, ამით ყველაფერი ნათქვამია, – ამის შესახებ „ქართული ოცნების“ აღმასრულებელმა მდივანმა, მამუკა მდინარაძემ ჟურნალისტებს პარლამენტში რადიკალურ ოპოზიციაზე საუბრისას განუცხადა.
მისი თქმით, იუსტიციის უმაღლესი საბჭოს წევრობის კანდიდატების ასარჩევად კენჭისყრაში მონაწილეობის გამო ოპოზიციონერ დეპუტატებზე წარმოუდგენელი ბულინგი განხორციელდა.
„უპრეცედენტო ბულინგი განხორციელდა, ვინც მხარი დაუჭირა ევროპული რეკომენდაციის ერთ-ერთი პუნქტის შესრულებას, რომელიც საბედნიეროდ, მეტწილად უკვე შესრულებულია. თუმცა, ძალიან კარგი იქნება ეს საქმე ბოლომდე მივიდეს, მაგრამ ამის გარეშეც შეგვიძლია თავისუფლად ვთქვათ, რომ ეს პუნქტი მეტწილად შესრულებულია“, – განაცხადა მდინარაძემ.
მისივე თქმით, ამ საკითხზე ოპოზიციასთან კონსულტაციებს გამართავენ, თუმცა არა ისე, როგორც ეს მათ სურთ. მდინარაძის განმარტებით, მათ მიმართეს ოპოზიციას წარმოადგინონ მათთვის სასურველი კანდიდატები, რათა ერთმანეთი არ დააბულინგონ.
„ჩვენ ვნახეთ ბულინგი. რისი მოლოდინიც გვქონდა, გუშინ ახდა – ერთმანეთი საშინლად დააბულინგეს ფაშისტური მეთოდებით და დღეს ვერც-ერთმა ოპოზიციონერმა დეპუტატმა ამ ბულინგის საფუძველზე ვეღარ გაბედა, რომ ამ ევრორეკომენდაციებისთვის მხარი დაეჭირა“, – განაცხადა მდინარაძემ.
მან ასევე განმარტა, აქვს თუ არა მას მოლოდინი, რომ ოპოზიცია მომავალი ორი კვირის განმავლობაში საერთო 2 კანდიდატზე შეთანხმდეს.
„არ ვიცი, მე არ შეიძლება მქონდეს მოლოდინი, რომ ისინი ახლა გამოიჩენენ დიდსულოვნებას და კანდიდატებს შეარჩევენ, რადგან ეჭვი მაქვს, მათ რომ ძალიან უნდათ, ისეთი ორი კანდიდატი წარმოდგენილ ოთხ კანდიდატს შორის არ არის. ერთ-ერთთან დაკავშირებით განაცხადეს, რომ ნაკლებად მისაღებია, მაგრამ მათგან კონსტრუქციულობას არ ველით. თუმცა, ჩვენ ჩვენს წინადადებას მაინც ვეტყვით. ნუ გავაცდენთ ამ ორ კვირას და პირდაპირ ვეუბნები მათ, რა სურთ ახლავე პირდაპირ თქვან“, – განაცხადა მდინარაძემ.