საქართველოს პარლამენტის თავმჯდომარის მოადგილის არჩილ თალაკვაძის განცხადებით, იუსტიციის უმაღლესი საბჭოს წევრების არჩევის პროცესით, ოპოზიციის მხრიდან, სახელმწიფო ინტერესებით და საქართველოს ევროპული მომავლით ვაჭრობა გრძელდება.
თალაკვაძის თქმით, თუ ოპოზიცია კონსტრუქციულ გადაწყვეტილებებს არ მიიღებს, ისინი იძულებული გახდებიან ევროპელ კოლეგებს დეტალურად აუხსნან, თუ რატომ ვერ მოხერხდა ამ პუნქტის ბოლომდე შესრულება.
“მოლოდინი ნაკლებია იმასთან დაკავშირებით, რომ ოპოზიცია სახელმწიფოებრივი გადმოსახედიდან და საჭიროებებიდან მიიღებს გადაწყვეტილებას და კონსტრუქციულად ჩაერთვება ამ საკითხის შესრულებაში. ჩვენ, შემდეგი ნაბიჯი გვრჩება ის, რომ ჩვენს ევროპელ კოლეგებს ავუხსნათ დეტალურად, თუ რატომ ვერ შესრულდა ეს ნაწილი ბოლომდე და მე დარწმუნებული ვარ, რომ ეს არგუმენტები იქნება გაზიარებული. ფაქტია, რომ რადიკალური ოპოზიციის მხრიდან, ვაჭრობა გრძელდება სახელმწიფო ინტერესებით და საქართველოს ევროპული მომავლით”, – განაცხადა არჩილ თალაკვაძემ.