ჩვენ გვრჩება შემდეგი ნაბიჯი ის, რომ ევროპელ კოლეგებს ავუხსნათ დეტალურად, თუ რატომ ვერ შესრულდა ეს ნაწილი ბოლომდე, – ამის შესახებ საპარლამენტო უმრავლესობის წევრმა, არჩილ თალაკვაძემ იუსტიციის უმაღლესი საბჭოს სრულად დაკომპლექტების საკითხზე საუბრისას აღნიშნა.
„დარწმუნებული ვარ, ეს არგუმენტები გაზიარებული იქნება. ფაქტია, რომ რადიკალური ოპოზიციის მხრიდან გრძელდება ვაჭრობა სახელმწიფო ინტერესებით და საქართველოს ევროპული მომავლით. ეს ის ხალხია, რომლებიც ევროპაში ჩადიან და ითხოვენ საქართველოს წინააღმდეგ სანქციებსა და კანდიდატის სტატუსის დაბლოკვას, ხოლო პარლამენტში გვეუბნებიან, რომ ამა და ამ პირობებს თუ არ დავაკმაყოფილებთ, მაშინ არ დაუჭერენ მხარს საბჭოს დაკომპლექტებას“, – განაცხადა თალაკვაძემ.
შეთანხმდებიან თუ არა პოლიტიკური ძალები იუსტიციის უმაღლესი საბჭოს ორ არამოსამართლე კანდიდატზე საბოლოოდ, კენჭისყრის შედეგებით გაირკვევა.
დეპუტატები პარლამენტის სხდომისთვის ემზადებიან, თუმცა ამ დრომდე უცნობია, ჩატარდება თუ არა დღეს კენჭისყრა. პარლამენტმა იუსტიციის უმაღლესი საბჭოს სამი არამოსამართლე წევრი ცოტა ხნის წინ აირჩია. პროცესში მონაწილეობა მიიღო ოპოზიციის ნაწილმაც, რის გამოც მათ ფრაქცია „ნაციონალური მოძრაობა“ დაატოვებინეს.