მგონია, რომ ვოლოდიმირ ზელენსკის განცხადება ქართველი ხალხის მიმართ სოლიდარულია და არა ის, რომ ჩვენი და ლუკაშენკოს რეჟიმი იგივეა, – ამის შესახებ „გირჩის“ ერთ-ერთმა ლიდერმა, იაგო ხვიჩიამ საქართველოს პირველ არხს განუცხადა.
ხვიჩიას თქმით, უკრაინის პრეზიდენტისგან ქართველი ხალხის გულშემატკივრობა მოისმინა.
„ზელენსკისგან ქართველი ხალხის გულშემატკივრობა მოვისმინე, თუნდაც იმ გაგებით, რომ მოყვარეს პირში უზრახო. მგონი, ზუსტად ეს ნაწილი იყო, რაც ჩვენ არ მოგვეწონა, როცა რაღაცნაირი პარალელი გაივლო ბელარუსთან. შორს ვარ იმ აზრისგან, რომ საქართველო ბელარუსია, მაგრამ სიტუაციურად რაღაც თვალსაზრისით ჩვენ არ ვართ უკრაინის მხარეს და ეს გასაგებია. საქართველო დასავლურ ინტეგრაციას იმსახურებს და ეს თქვა ზელენსკიმ. მან აღნიშნა ისიც, რომ უკრაინას თუ არ აქვს ნატო-ში მიღების გარანტია, მაშინ ისეთ ქვეყნებსაც ვერ ექნება, როგორიც ჩამოთვლილი იყო. ეს განცხადება თავისი შინაარსით უფრო მეტად იყო გულშემატკივრის პოზიცია, რომ საქართველო იმსახურებსო. მგონია, რომ კრიტიკული ნაწილი არ უნდა გაგვიკვირდეს მებრძოლი ადამიანისგან, რომელიც ჩვენგან სათანადო მხარდაჭერას ვერ პოულობს. ამიტომ, ეს განცხადება არ მწყინს. მგონია, რომ ქართველი ხალხის მიმართ სოლიდარულია და არა ის, რომ ჩვენი და ლუკაშენკოს რეჟიმი იგივეა“, – განაცხადა ხვიჩიამ.