რამდენიმე საკითხი დაგვრჩა, სადაც ბოლოში გავდივართ და იმის იმედი გვაქვს, რომ შესაბამისად შეფასდება, თუმცა დაგვჭირდება დამატებითი კონსულტაციები იმასთან დაკავშირებით, რომ თითოეულ პუნქტს ჩავყვეთ, რომ ჩვენმა ევროპელმა კოლეგებმა ვერცერთთან დაკავშირებით ვერ გვისაყვედურონ, – ამის შესახებ „ქართული ოცნების“ აღმასრულებელმა მდივანმა, ფრაქცია „ქართული ოცნების“ თავმჯდომარემ მამუკა მდინარაძემ ჟურნალისტებს პარტიის ოფისში გამართულ ბრიფინგზე განუცხადა.
„არაერთხელ გვითქვამს და დღესაც გავიმეორებ, რომ რეკომენდაციების დიდი ნაწილი არის შესრულებული, რამდენიმე საკითხი დაგვრჩა, სადაც ბოლოში გავდივართ და იმის იმედი გვაქვს, რომ შესაბამისად შეფასდება, თუმცა დაგვჭირდება დამატებითი კონსულტაციები იმასთან დაკავშირებით, რომ თითოეულ პუნქტს ჩავყვეთ, რომ ჩვენმა ევროპელმა კოლეგებმა ვერცერთთან დაკავშირებით ვერ გვისაყვედურონ. სამი რეკომენდაცია აბსოლუტურად შესრულებულად ჩაითვალა, ყველაზე კრიტიკული და კონსერვატიული მიდგომით. გარკვეული პროგრესი დაგვეწერა იმ პუნქტებთან დაკავშირებით, სადაც რვა პუნქტიდან შეგვიძლია ვთქვათ, რომ შვიდი პრაქტიკულად ბოლოშია გასული და ამოწურულია. კიდევ მეტად ობიექტური შეფასება ჩვენ მოგვცემდა შესაძლებლობას, რომ გვეთქვა, რომ სამი კი არა, ათი პუნქტია შესრულებული, მაგრამ იქ თუ რაღაც შენიშვნები არსებობს, ვაგრძელებთ მუშაობას. ბევრი ფრაზა, ბევრი ქვეპუნქტია, რომელთან დაკავშირებითაც შეიძლება დისკუსია და რომლის შესრულება-არშესრულებაზე დამატებითი კონსულტაციები ბევრი გვექნება ჩვენს პარტნიორებთან იქიდან გამომდინარე, რომ ჩვენ ვითხოვთ, რომ არ დავიჩაგროთ და შეფასების კრიტერიუმებიც იყოს სამართლიანი. საბოლოო ჯამში, ყველაფერს გავაკეთებთ იმისათვის, რომ საბაბიც კი არ ჰქონდეს ვინმეს, რომ რეკომენდაციების შეუსრულებლობის მოტივზე ილაპარაკონ, სამართლიანად რა თქმა უნდა“, – განაცხადა მდინარაძემ.