3 ივლისს მთელი ქვეყნის მასშტაბით 2023 წლის გამოცდები ქართული ენისა და ლიტერატურის გამოცდით დაიწყო.
პირველი გამოცდის მიმდინარეობას საქართველოს განათლებისა და მეცნიერების მინისტრი გიორგი ამილახვარი თბილისის 175-ე საჯარო სკოლაში გახსნილ საგამოცდო ცენტრში პირადად გაეცნო. ინფორმაციას განათლების და მეცნიერების სამინისტრო ავრცელებს.
„მინისტრმა საგამოცდო ცენტრი დაათვალიერა, აბიტურიენტებს წარმატებები უსურვა და იმედი გამოთქვა, რომ აპლიკანტები სპეციალურად მათთვის შექმნილ მშვიდ და კომფორტულ აკადემიურ გარემოში თავიანთი შესაძლებლობების მაქსიმუმის გამოვლენას შეძლებენ.
თბილისის 175-ე სკოლაში გახსნილ საგამოცდო ცენტრში მიმდინარე საგამოცდო პროცესს მინისტრთან ერთად, მისი მოადგილე გელა გელაძე და შეფასებისა და გამოცდების ეროვნული ცენტრის უფროსი სოფიო გორგოძეც გაეცნენ.
აღსანიშნავია, რომ წელს მთელი ქვეყნის მასშტაბით 24 საგამოცდო ცენტრი ფუნქციონირებს – საგამოცდო პროცესი ერთდროულად მიმდინარეობს თბილისში, ბათუმში, ზუგდიდში, ქუთაისში, ფოთში, ახალციხეში, გორში, ოზურგეთში, რუსთავში, თელავსა და ხულოში. წელს პირველად საგამოცდო ცენტრი გახსნილია ამბროლაურშიც.
საგამოცდო ცენტრებში ყველა საჭირო პირობაა შექმნილი აპლიკანტებისთვის –სივრცეები სრულად არის აღჭურვილია შესაბამისი ავეჯით, აუცილებელი ინვენტარითა და კონდიცირების სისტემით. თითოეული ცენტრი უზრუნველყოფილია სასწრაფო და სახანძრო დახმარების სერვისებით, გამართული საგზაო ინფრასტრუქტურითა და საგამოცდო ცენტრამდე მისასვლელი დამატებითი საზოგადოებრივი ტრანსპორტით.
საგამოცდო ცენტრები 2023 წელს ჯამში 75 000-ზე მეტ გამოსაცდელს – აბიტურიენტებს, სტუდენტთა საგრანტო კონკურსში მონაწილეებს, მაგისტრანტობის კანდიდატებს, მასწავლებლობისა და პედაგოგის სტატუსის ამაღლების მსურველებს მიიღებენ.
შეგახსენებთ, რომ საგნისა და უფროსი სპეციალური მასწავლებლის გამოცდაზე დარეგისტრირებულები საგამოცდო პროცესში 6 ივლისიდან ჩაერთვებიან. 12 ივლისს ჩატარდება სტუდენტთა საგრანტო კონკურსი, ხოლო მაგისტრანტობის კანდიდატები საერთო სამაგისტრო გამოცდას 27-28 ივლისს ჩააბარებენ“, – აღნიშნულია ინფორმაციაში.